Qazaqstandyq oqýshylar AQSh-ta ótken dron sporty boıynsha eki halyqaralyq jarysta úzdik bestikke endi
ASTANA. KAZINFORM — Qazaqstandyq oqýshylar AQSh-ta ótken dron sporty boıynsha halyqaralyq jarystarda joǵary nátıje kórsetti.
12 jastaǵy Álıhan Nsanbaev MultiGP World Championship 2026 álem chempıonatynda besinshi oryn ıelense, dron-fýtboldan Qazaqstan ulttyq quramasy USA Drone Soccer International Cup 2026 týrnırinde úzdik bestikke endi.
Dallas qalasynda ótken álem chempıonatyna 44 elden 830 sportshy qatysyp, olardyń 69-y irikteý kezeńinen ótti. Іrikteý ushýlarynyń qorytyndysy boıynsha Álıhan Nsanbaev 12 fınalıstiń qataryna enip, besinshi orynǵa ıe boldy. Jas sportshy Oral qalasyndaǵy Oblystyq tehnıkalyq shyǵarmashylyq ortalyǵynda bilim alady jáne «Aspan» komandasynyń múshesi. Onyń jattyqtyrýshylary — Qaısar Esenǵalı men Andreı Tıshın.
Long-Bıch qalasynda ótken dron-fýtboldan halyqaralyq týrnırde Qazaqstan quramasy alty elden qatysqan 16 komandanyń arasynda besinshi oryn aldy. Elimizdiń namysyn Oral jáne Atyraý qalalarynan kelgen Naýryzbek Esetov, Aldııar Baýyrjan, Álıhan Nsanbaev jáne Altaır Ábilǵazıev qorǵady.
Quramany jarysqa Qaısar Esenǵalı, Nurbol Qyryqbaev, Dıdar Sahratov jáne Aleksandr Shımanovskıı jattyqtyrdy.
Álıhan álem chempıonatyna joldamany Oqý-aǵartý mınıstrliginiń Respýblıkalyq qosymsha bilim berý oqý-ádistemelik ortalyǵy «Aspandrone» qoǵamdyq birlestigimen birlesip, «Dronly Ltd.» kompanııasynyń qoldaýymen uıymdastyrǵan Kazakhstan Drone Championship & Cup respýblıkalyq týrnıriniń qorytyndysy boıynsha jeńip aldy. Atalǵan seriktesterdiń qoldaýymen dron-fýtboldan ulttyq quramanyń halyqaralyq jarystarǵa qatysýy da qamtamasyz etildi.
Qazaqstanda dron sporty boıynsha jarystar óńirlik, oblystyq jáne respýblıkalyq deńgeılerde ótkiziledi. Bul jarystar daryndy oqýshylardy anyqtaýǵa, olardyń ınjenerlik oılaý qabiletin damytýǵa, robototehnıka men zamanaýı tehnologııalarǵa qyzyǵýshylyǵyn arttyrýǵa, sondaı-aq jas sportshylardy halyqaralyq chempıonattarǵa daıyndaýǵa múmkindik beredi.
Aıta ketelik Qazaqstandyq komandalar dron-fýtboldan halyqaralyq týrnırdiń úzdik ondyǵyna engen edi.
