Qazaqstandyq oqýshy plastık qaldyqtarynan eko-asfalt óndirý tehnologııasyn oılap tapty
ASTANA. KAZINFORM – Abaı oblysy Aıagóz qalasyndaǵy №10 mektep-gımnazııasynyń 10-synyp oqýshysy Arýjan Qabdýlmaratova qaıta óńdelgen plastıkti paıdalana otyryp, «Eko-asfalt» tehnologııasyn ázirledi.
Jas ǵalym jobamen 7-synyptan bastap aınalysyp, birneshe jyl boıyna júıeli túrde damytty. Nátıjesinde turmystyq plastık qaldyqtaryn qaıta óńdep, ony asfalt quramyna qosýǵa múmkindik beretin sheshim usyndy.
Asfaltqa plastık qosý onyń beriktigin arttyryp, paıdalaný merzimin uzartady. Mundaı ónim óziniń paıdalaný sıpattamalaryn 12–18 jylǵa deıin, keıde 20–25 jylǵa deıin saqtaı alady. Sonymen qatar dástúrli tehnologııalarmen salystyrǵanda óndiris quny tómendeıdi.
Oqý-aǵartý mınıstrligi málimetinshe, jobada qosymsha jol jabynynyń sapasyn baqylaýdy avtomattandyrý da qarastyrylǵan. Oqýshy jol boıyna avtonomdy robottar júıesin engizýdi de usynady. Onyń tujyrymdamasy boıynsha, «A» roboty jol betindegi aqaýlardy anyqtasa, «V» roboty olardy jedel túrde jóndeıdi. Bul tásil jóndeý shyǵyndaryn azaıtýǵa múmkindik beredi.
«Eko-asfalt» ázirlemesi plastık qaldyqtarynyń kólemin azaıtýǵa jáne jol qurylysyna zamanaýı sheshimderdi engizýge baǵyttalǵan.
Aıta keteıik, elordadaǵy № 119 mekteptiń 10-synyp oqýshysy Aıat Tájen Raspberry Pi jınaǵyn paıdalana otyryp, shaǵyn kompıýter qurastyryp, baǵdarlamalady.
