Qazaqstandyq oqýshy álemdegi úzdik bes jas baǵdarlamashynyń qataryna endi
ASTANA.KAZINFORM — Tashkent qalasynda 92 elden 375 oqýshy qatysqan Informatıkadan halyqaralyq IOI 2026 olımpıadasy aıaqtaldy. Qazaqstan quramasynyń tórt múshesi de júlde ıelendi. Ulttyq qurama 1 altyn jáne 3 kúmis medal jeńip alyp, álemdik komandalyq esepte 10-orynǵa ıe boldy. Bul týraly Oqý-aǵartý mınıstrligi málim etti.
Bul — Qazaqstan quramasynyń olımpıada tarıhyndaǵy úzdik nátıjeleriniń biri. Astana qalasyndaǵy «Spectrum» halyqaralyq mektebiniń 12-synyp oqýshysy Maksım Tsoı altyn medal jeńip alyp, álemdik jeke esepte 5-oryn ıelendi.
Osylaısha ol álemdegi úzdik bes jas baǵdarlamashynyń qataryna endi. Kúmis medal ıegerleri:
Aldııar Seıtbaı — Astana qalasyndaǵy daryndy balalarǵa arnalǵan «Bilim-ınnovatsııa» mamandandyrylǵan lıtseı-ınternatynyń 11-synyp oqýshysy;
Mansýr Mamadahýnov — Qyzylorda oblysyndaǵy daryndy balalarǵa arnalǵan «Bilim-ınnovatsııa» mamandandyrylǵan lıtseı-ınternatynyń 11-synyp oqýshysy;
Asqar Ákejan — Semeı qalasyndaǵy fızıka-matematıka baǵytyndaǵy NIS-tiń 12-synyp oqýshysy.
Qazaqstan qurama jetekshileri: Satylhanov Temirlan — Astana IT University bas jattyqtyrýshysy; Qýanyshbaı Aıbar — International University of Information Technology sınor-lektory.
2025 jyly qazaqstandyq oqýshylar 3 kúmis jáne 1 qola medal jeńip alyp, álemdik komandalyq esepte 14-oryn ıelengen bolatyn. Bıyl ulttyq qurama óz nátıjesin tórt satyǵa jaqsartty. Qazaqstandyq oqýshylar Informatıkadan halyqaralyq olımpıadaǵa qatysqan jyldar ishinde barlyǵy 79 medal jeńip aldy.
Eske sala keteıik, buǵan deıin Qazaqstandyq oqýshylar matematıka olımpıadasynda álemniń úzdik 25 quramasynyń qataryna endi.
