Qazaqstandyq oqytýshylar «Lý Ban» sheberhanasynda jasandy ıntellektti meńgerdi
ASTANA. KAZINFORM — Elordada «Lý Ban» sheberhanasynda jasandy ıntellekt boıynsha alǵashqy pılottyq kýrsty sátti aıaqtaǵan joǵary oqý oryndarynyń oqytýshylary men mamandaryna sertıfıkat tabystaý saltanaty ótti.
Qazaqstan men Qytaı basshylarynyń qatysýymen ashylǵan bul ortalyq búginde otandyq ǵylymnyń naǵyz tehnologııalyq alańyna aınalyp otyr.
Jobanyń sátti júzege asýyna 2025 jyldyń maýsym-shilde aılarynda Qytaıdyń Tıantszın qalasyndaǵy kásiptik tehnıkalyq ınstıtýtynda bir aılyq ǵylymı taǵylymdamadan ótken 15 oqytýshynyń eńbegi zor. Olar Qytaıda meńgergen bilimderi men tájirıbesin qazir qazaqstandyq áriptesteri men stýdentterimen bólisip júr.
— Biz Qytaıda bir aı boıy tórt basty modýl boıynsha bilim aldyq. Olar: robot jáne avtomattandyrý júıesi, LLM, drondar júıesi jáne qaýipsizdik júıeleri. LLM — qarapaıym tilmen aıtqanda, mátindi túsinip, jaýap bere alatyn tildik model. Oqýdan soń óz fakýltetimizdegi professor-oqytýshylar quramy men stýdentterdi úırettik. Qazir stýdentter praktıka júzinde nátıje kórsetip jatyr. Al búgin elimizdiń túkpir-túkpirinen kelgen 28 professorǵa osy baǵyttar boıynsha sertıfıkat tapsyryldy, — deıdi aqparattyq júıeler kafedrasynyń PhD doktory Mansııa Hantóreeva.
Tsıfrlandyrý jónindegi prorektor Gúlmıra Bekmanovanyń aıtýynsha, bul sheberhana — eki el arasyndaǵy seriktestiktiń jemisi. 2025 jyly Memleket basshysy Qasym-Jomart Toqaev pen Qytaı Prezıdenti Sı Tszınpınniń qatysýymen ashylǵan bul baza jasandy ıntellekt salasyndaǵy bilimdi tereńdetýge arnalǵan. Sheberhanadaǵy jabdyqtardyń barlyǵy — Tıantszın qalasynan kelgen sońǵy úlgidegi tehnologııalar.
Jas ǵalymdar men stýdentterdiń de bul baǵytqa degen qulshynysy joǵary. Aqparattyq tehnologııalar fakýltetiniń 3-kýrs stýdentteri sabaqtan tys ýaqyttaryn osy sheberhanada ótkizýdi ádetke aınaldyrǵan.
— Bul jer óte qyzyqty. Biz robottarǵa kod jazyp, olardyń túrli salalarda kómektesýin zertteımiz. Munda robot-suryptaýshylar men manıpýlıatorlar bar. Meniń jobam — avtomatty suryptaý jumysyna arnalǵan. Taýardyń ústindegi QR-kodty oqý arqyly robot ony Qaraǵandy, Almaty nemese Astana qalalarynyń qoımasyna jiberý kerektigin ózi anyqtaıdy, — deıdi fakýltet stýdentteri Oljas Erkinuly men Arlan Tájibaev.
Aldaǵy ýaqytta «Lý Ban» sheberhanasynyń jumysyn odan ári keńeıtý josparlanyp otyr. Jańa úlken kabınetter ashylyp, stýdentter men oqytýshylardyń zamanaýı jabdyqtarmen erkin jumys isteýine múmkindik týady.
Aıta keteıik, JI mamandaryn daıarlaý úshin 12 sheteldik JOO tartylǵanyn jazǵan edik.