Qazaqstandyq oqytýshy 5 saǵatta 100-den astam án oryndap, dúnıejúzilik rekordtar kitabyna endi
ASTANA. KAZINFORM – Abaı oblysynda qazaqtyń dástúrli án ónerin halyqaralyq deńgeıde nasıhattaýǵa baǵyttalǵan mádenı is-shara ótti. Nátıjesinde QR Mádenıet salasynyń úzdigi, Shakarim University «Óner» kafedrasynyń oqytýshysy, ýnıversıtettiń Qurmetti professory Qaırat Qabyshev etnomádenıet baǵyty boıynsha Azııa men Afrıkanyń dúnıejúzilik rekordtar kitabyna endi.
Ǵylym jáne joǵary bilim mınıstrligi málimetinshe, rekordty tirkeý qorytyndysy boıynsha óner ıesine resmı sertıfıkat pen kúmis medal tabystaldy.
Qaırat Arqashuly rekord ornatý barysynda qazaqtyń 102 dástúrli ánin 5 saǵat 29 mınýt boıy oryndady. Rekord talaptaryna sáıkes ár 25 ánnen keıin 15 mınýttyq úzilis jasaý múmkindigi qarastyrylǵanymen, oryndaýshy bul quqyqty paıdalanǵan joq. Barlyq shyǵarma notasyz, mátinsiz, fonogrammasyz jáne oryndaýshynyń óz aspaptyq súıemeldeýimen oryndaldy.
is-sharaǵa halyqaralyq Global Best of Records (GBR) uıymynyń Azııa jáne Afrıka dıvızıony boıynsha rekordtardy tirkeý jónindegi bas ofıtseri Qýandyq Qudaıbergen qatysyp, kórsetilgen nátıjeniń biregeı sıpatyn atap ótti.
Onyń aıtýynsha, dúnıejúzilik rekordtar kitaby sarapshylarynyń sheshimimen rekord resmı túrde tirkelip, 2026 jylǵy basylymǵa engiziledi.
Jobaǵa sarapshylyq baǵa bergen Qazaqstannyń eńbek sińirgen qaıratkeri, Qurmanǵazy atyndaǵy Qazaq ulttyq konservatorııasynyń professory Erkin Shúkiman atalǵan jetistiktiń qazaqtyń dástúrli án ónerin halyqaralyq deńgeıde dáripteýge yqpal etetinin atap ótti.
Qaırat Qabyshev bul nátıjege ulttyq ánshilik mektep dástúri men ustazdar taǵylymynyń negiz bolǵanyn aıtty. Sondaı-aq mundaı bastamalar jastar arasynda ulttyq ónerdi nasıhattaýǵa serpin beretinin jetkizdi.
Atalǵan rekord qazaqtyń dástúrli án óneriniń halyqaralyq deńgeıde tanylýy men ulttyq mádenıettiń jahandyq keńistiktegi bedeliniń artyp kele jatqanyn kórsetedi.
Atyraýlyq qutqarýshy 165 tonnalyq 7 vagondy súırep, el rekordyn jańartqanyn jazǵan edik.
