Bir kezderi noýtbýk qurastyrǵan Kırov zaýyty qazir qandaı ónim shyǵarady
PETROPAVL. KAZINFORM — Bir kezderi elimizde alǵashqylardyń biri bolyp kompıýterlik tehnıka qurastyrýdy qolǵa alǵan Petropavldaǵy Kırov atyndaǵy zaýyt búginde basqa óndiristik baǵyttarǵa basymdyq berip otyr.
«Zavod ım. S. M. Kırova» (ZıK) kásipornynyń málimetinshe, 2020 jyldan bastap munda 62 myńnan astam kompıýterlik tehnıka shyǵarylǵan. Alaıda qazir kompıýter, noýtbýk pen planshet óndirisi zaýyttyń negizgi mindetteriniń qatarynda joq.
ZIKComputers brendimen shyqqan otandyq tehnıkanyń óndirisi jalǵasa ma? Kásiporynnyń búgini men jospary qandaı?
Radıoqabyldaǵyshtardan noýtbýkterge deıin
Kırov atyndaǵy zaýyttyń tarıhy 1928 jyldan bastalady. Kásiporyn alǵashynda shaǵyn radıomontaj sheberhanasy retinde qurylǵan.
Keńes dáýirinde zaýyt «Pobeda», «Rekord», «Qazaqstan» radıoqabyldaǵyshtaryn, «Esil» radıoqabyldaý qurylǵysyn jáne túrli elektr aspabyn shyǵardy. Áıelder arasynda, ásirese, elektr vafel pisirgishter tanymal boldy.
Alaıda zaýyt turmystyq tehnıkamen ǵana shektelmeı, qorǵanys salasynyń tapsyrystaryn da oryndady.
ZIKComputers qalaı paıda boldy?
Kásiporyn kompıýterlik tehnıka shyǵarý bastamasyn 2018 jyly qolǵa aldy. Elektronıka, kompıýterlik tehnıka jáne serverlik jabdyqtar óndirýde tájirıbesi bar qytaılyq Great Wall kompanııasymen áriptestik ornatyp, 2019 jyly taraptar jańa joba boıynsha iske kirisedi.
Nátıjesinde, ZIKComputers otandyq kompıýterlik tehnıka brendi paıda boldy. 2020 jyly karantınge baılanysty SQO, Pavlodar, Aqmola jáne Qostanaı oblystarynyń tapsyrysy boıynsha 48 myńnan astam ZIK kompıýterleri, planshetteri men noýtbýktary jetkizildi.
Noýtbýk óndirisi nege toqtady?
«ZıK» kásipornynyń málimetinshe, qazirgi ýaqytta naryq talabyna saı óndiristik qýat jáne ınjenerlik-tehnıkalyq áleýet radıoelektronıka, arnaıy aspap jasaý jáne salalyq tapsyrystardy oryndaýǵa baǵyttalǵan.
Desek te, zaýyt kompıýterlik tehnıka óndirýge qajetti tehnologııalyq negizi men quzyretterin saqtap qalmaq, ıaǵnı bul baǵytqa oralý múmkindigi bar. Alaıda ázirshe kompıýterlik tehnıka óndirisin qaıta bastaý týraly naqty sheshim nemese onyń merzimi jarııalanǵan joq.
Zaýyt qazir nemen aınalysady?
Búginde kásiporynnyń negizgi jumystarynyń biri — temirjol salasyndaǵy radıostantsııalarǵa keshendi tehnıkalyq qyzmet kórsetý jáne «KLÝB-Ý» júıelerine servıstik qoldaý kórsetý.
Buǵan qosa, zaýyt temirjol ınfraqurylymynda qoldanylatyn arnaıy jabdyqtar shyǵarady. Olardyń qatarynda ÝPV-1 sóılesý qurylǵylary, SRS-6 relsti qosqyshtary, RESF-01/50 mys relsti túıispeli qosqyshtary bar.
Elektronıka óndirisi de — kásiporyn qyzmetiniń mańyzdy baǵyttarynyń biri. Kásiporyn dáldiktiń 5 klasyna deıingi baspa platalaryn shyǵarady, sondaı-aq bettik montajdaýdyń tolyq tsıklin (SMD-montajdaý) oryndaıdy.
Tapsyrystar portfeliniń bir bóligin «Qazaqstan temir joly» ulttyq kompanııasy alǵan. «ZıK» AQ memlekettik qorǵanys tapsyrysyn oryndaýmen qatar, ónimder men qyzmetterdi «Samuryq-Qazyna» ulttyq ál-aýqat qorynyń reglamenttelgen rásimderi jáne tikeleı kommertsııalyq tapsyrystar aıasynda usynady.
Zaýyttyń bolashaǵy qandaı?
Aldaǵy ýaqytta «ZıK» AQ óndiristik áleýetin damytyp, joǵary tehnologııalyq ónimderdiń jańa túrlerin ıgerýdi josparlap otyr.
— Bolashaqta zamanaýı lıft jabdyqtaryn, balalar men úı janýarlaryna arnalǵan baqylaý trekerlerin, sottalǵandardyń qozǵalysyn baqylaýǵa arnalǵan qurylǵylardy, sondaı-aq taksofon apparattarynyń jańa úlgilerin shyǵarýdy josparlap otyrmyz. Kásiporyn qoldanystaǵy kelisimsharttar boıynsha bekitilgen josparǵa sáıkes jumys isteıdi. Qyzmetkerlerdiń jumys kestesinde ózgeris joq jáne qoldanystaǵy sharttyq mindettemeler eshqandaı kidirissiz oryndalyp jatyr. Jalpy kásiporynnyń odan ári damý baǵyty jańa ónimderdi ıgerýge jáne negizgi óndiristik mindetterdi oryndaýǵa baǵdarlanǵan, — dedi kásiporynnyń bas dırektory Almas Nurmaǵanbetov.
Buǵan deıin SQO-daǵy zaýyttarda kadr tapshylyǵy ózekti máselege aınalǵanyn jazǵan edik.
