Qazaqstandyq Neo Nomad vızasyn qansha shetel azamaty aldy
ASTANA. KAZINFORM – Elimizde Neo Nomad vızasy byltyr qarashada iske qosyldy.
Neo Nomad Visa – qashyqtan jumys istep, Qazaqstanda týrıst retinde keletin shetel azamattaryna arnalǵan. Vızany bir jylǵa deıin uzartýǵa bolady.
- Vıza shetel azamatyna elimizde bolýǵa múmkindik beredi, biraq Qazaqstannyń eńbek naryǵynda jumys isteı almaıdy. Shetel azamattary qashyqtan jumys istep, Qazaqstanda qonaq, týrıst bola alady. Qazaqstanda bolý merzimi aıaqtalǵannan keıin shetel azamaty salyq esebine turýy kerek. Sonymen qatar vıza alǵandardy qosarlanǵan salyqtan bosatatyn halyqaralyq zańnama da bar. Sebebi Qazaqstanda resmı túrde jumys istemeıdi, olar týrıster, - dedi Týrızm jáne sport mınıstriniń orynbasary Erjan Erkinbaev Syrtqy ister mınıstrliginde ótken Neo Nomad Visa, Digital Nomad Visa jáne B9 vızalaryn túsindirýge arnalǵan brıfıng barysynda.
Sondaı-aq vıtse-mınıstr álemniń 20 elinde osy sekildi vıza túri baryn tilge tıek etti.
- Neo Nomad vızasy byltyr qarashada iske qosyldy, búginde 7 shetel azamaty vıza aldy, - deıdi E.Erkinbaev.
Eske sala ketsek, byltyr qarashada Memleket basshysy Qasym-Jomart Toqaevtyń tapsyrmasy boıynsha Neo Nomad dep atalatyn jańa vıza túri engizildi. Bul vıza zamanaýı kóshpendilerge – saıahattap, qashyqtan jumys isteıtin sheteldik týrısterge arnalǵan.
Aıta ketsek, Neo Nomad vızasynyń alǵash ıegeri – energetıka jáne qarjy salasynda tájirıbesi bar Ulybrıtanııa azamaty Sertach Iener.
Bıyl qańtarda Kazakh Tourism ulttyq kompanııasy taǵy eki sheteldik azamatqa zamanaýı kóshpendilerge arnalǵan Neo Nomad Visa berilgenin habarlady.