Qazaqstandyq Neo Nomad vızasyn qansha shet memleket azamattary aldy
ASTANA. KAZINFORM — Qazaqstan saıahat pen qashyqtan eńbek etýdi ushtastyratyn adamdar úshin tartymdy baǵytqa aınalyp keledi. Ótken jyly iske qosylǵan Neo Nomad Visa aıasynda 14 shet memlekettiń 27 azamaty elimizde bir jyl merzimge turýǵa múmkindik aldy. Bul týraly Kazakh Tourism ulttyq kompanııasy málim etti.
— Neo Nomad Visa alǵandar qatarynda AQSh, Kanada jáne Frantsııa elderiniń azamattary basym. Sonymen birge vıza Jańa Zelandııa, Ulybrıtanııa, Irlandııa, Sıngapýr, Ońtústik Koreıa, Aýstralııa, Birikken Arab Ámirlikteri, Brazılııa, Latvııa jáne Polsha azamattary da berilgen, — dep jazdy ulttyq kompanııadan.
Neo Nomad Visa álemniń túkpir-túkpirindegi saıahatshylar úshin jańa múmkindikterge jol ashady. Bul vıza arqyly shetel azamattary óz elderindegi kompanııalarda qashyqtan jumysyn jalǵastyryp, Qazaqstandy bir jyl ishinde tanyp-bile alady.
Vızanyń bul túri boıynsha Qazaqstanda eńbek etý múmkindigi qarastyrylmaǵanyn atap ótken jón.
Vızany alý úshin shetel azamattary elimizdiń shet memleketterdegi elshilikteri men konsýldyq mekemelerine júginýi tıis.
Eske sala keteıik, buǵan deıin Týrızm jáne sport mınıstri Erbol Myrzabosynov vızany kóshi-qon portaly arqyly elektrondy formatta rásimdeý múmkindigin engizýdi usynǵanyn jazǵan bolatynbyz.