Qazaqstandyq músinshiler halyqaralyq jarysta júldeger atandy
ASTANA.KAZINFORM – Qazaqstandyq músinshiler Qytaıdyń Tszıamýsy qalasynda ótken qar-muz festıvaline qatysyp, jeńimpazdar qatarynan kórindi.
Úsh adamnan quralǵan qazaqstandyq komanda at ústinde sadaq tartqan qazaq batyryn muzdan oıyp shyǵyp, qazylar alqasynyń oń baǵasyna ıe bolǵan. Qortyndysynda, otandastarymyz úshinshi orynnan kórindi.
Aıta keteıik, halyqaralyq muz oıma dodasyna Qazaqstan, Qytaı, Reseı, Mońǵolııa, Meksıka jáne Malaızııa sııaqty 10 elden 30-ǵa jýyq músinshi qatysyp, 4 kúnde týyndylaryn muzdan oıyp shyqty.
Qazaqstan komandasynyń kapıtany Joldas Ershattyń aıtýynsha, olar halyqaralyq festıvalge arnaıy shaqyrtýmen barǵan.
– Bizge osy festıvalge qatysýǵa usynys tústi. Biz oılanbastan kelisip, Qytaıǵa jol tartyp kettik. Qytaıdyń Heılýntszıan provıntsııasy qar-muz óneri mádenıetine óte baı. Sol sebepti osy dodaǵa qatysý biz úshin óte jaqsy tájirıbe boldy. Jalpy, bizdiń komanda 2011 jyldan beri qalany sándeý jumystarymen aınalysyp keledi. Al 2015 jyldan bastap elimizde muz qalashyqtar salý jáne muz oıma jasaý jumysyn atqardyq, - dedi.
Ershattyń aıtýynsha, qazylar alqasy qazaqstandyq komandanyń muz týyndysyn joǵary baǵalaǵan.
– Týyndymyzda atpen shaýyp bara jatyp sadaq tartqan qazaq batyry beınelengen. Sondaı-aq, týyndynyń ózgesheligi úshin qazaq ańyzyndaǵy qanatty barysty oıyp shyqtyq. Qazylar alqasy jáne qytaılyq kórermender músindi jaqsy baǵalap jatty, - dedi kapıtan.
Astanalyq músinshi Talaphan Azamattyń aıtýynsha, komanda kelesi joly Harbındegi úlken festıvalge qatysýdy josparlap otyr.
– Osy jeńisimizden keıin taǵy basqa usynystar túse bastady. Chýńchın qalasyndaǵy festıvalge shaqyrtý alyp otyrmyz. Jalpy, kelesi jyly Harbın qalasynda ótetin álemge tanymal festıvalde óner kórsetýdi kózdep otyrmyz, - dedi Azamat.
Buǵan deıin habarlaǵanymyzdaı, Qytaıdyń soltústik-shyǵysyndaǵy Heılýntszıan provıntsııasynda muz músinder baıqaýy ótti.