Qazaqstandyq músinshi Nıderlandtaǵy aqalteke jylqylary chempıonatynda «Absentti» ulyqtady
ASTANA. KAZINFORM — Qazaqstandyq músinshi Nurǵalym Isabaev Nıderlandta ótken aqalteke jylqylary arasyndaǵy tuńǵysh álem chempıonaty aıasynda uıymdastyrylǵan kórkem týyndylar kórmesine qatysty, dep habarlaıdy Kazinform agenttiginiń Eýropalyq Odaqtaǵy menshikti tilshisi.
Іs-sharany Eýropalyq aqalteke jylqy sharýashylyǵy qaýymdastyǵy men Túrikmenstannyń «Türkmen atlary» birlestigi uıymdastyrǵan.
Aqalteke tuqymdy jylqylar saıysyna álemniń 25 elinen ókilder qatysty. Sonymen qatar chempıonat aıasynda osy tuqymǵa arnalǵan óner týyndylarynyń arnaıy kórmesi uıymdastyryldy.
Kórmede Qazaqstannyń atynan Almatydan barǵan músinshi Nurǵalym Isabaev óner kórsetti. Onyń aıtýynsha, ol uıymdastyrýshylardyń shaqyrýymen aqalteke jylqysynyń músinin jáne ataqty «Absent» sáıgúligine arnalǵan kartınasyn alyp barǵan.
Aıta keteıik, Absent — 1952 jyly Qazaqstannyń Jambyl oblysyndaǵy Lýgovoı jylqy zaýytynda týǵan, qara tústi asyl tuqymdy aqalteke jylqysy. Ol Keńes Odaǵynyń eń tanymal sporttyq jylqysy sanalady. Salt atty Sergeı Fılatovtyń tizgindeýimen Absent 1960 jyly Rımde ótken Olımpıada oıyndarynda jeńiske jetip, keńestik at sporty tarıhyndaǵy alǵashqy altyn medaldi ıelendi.
Absenttiń soǵylǵan mystan jasalǵan músini týǵan jerinde — Jambyl oblysyndaǵy Lýgovoı jylqy zaýytynyń aýmaǵynda ornatylǵan. Onyń avtory Nurǵalym Isabaev músinde Olımpıada chempıonynyń asqaq bolmysyn, symbatyn jáne ózgeshe syrtqy kelbetin egjeı-tegjeıli beınelegen.
Bul joly da Nurǵalym Isabaev Nıderlandtaǵy kórmege Absentke arnalǵan kartınasyn usyndy.
— Absent beınelengen kartınaǵa kelsek, bul jylqynyń arǵy tegi – aqalteke. Ol don jylqysymen býdandastyrý arqyly dúnıege kelgen. Keńes Odaǵy kezinde Absent álemniń úsh dúrkin chempıony atanyp, úlken dańqqa bólendi. Onyń jasyn adam jasyna shaqqanda, álem chempıony atanǵan kezde shamamen 60 jasta bolǵan deýge bolady. Keńes Odaǵynyń atynan álemge tanylyp, keıin týǵan jerine — Lýgovoı jylqy zaýytyna oralyp, ómiriniń sońyna deıin sonda boldy, — deıdi músinshi.
Onyń sózinshe, bul týyndy birneshe jyl buryn jasalǵan. Músinshi jylqy taqyryby onyń súıikti ári joǵary baǵalaıtyn janrlarynyń biri ekenin aıtty. Sondyqtan at sporty ónerine arnalǵan bul músindi arnaıy jasap, kórmege alyp barǵan.
Uıymdastyrýshylardyń aıtýyna qaraǵanda, shyǵarmashylyq baıqaýdyń maqsaty — «aspan attary» atanǵan aqalteke jylqylarynyń tarıhı-mádenı murasyn, erekshe symbaty men ásemdigin keńinen nasıhattaý, sondaı-aq Eýrazııa elderi arasyndaǵy gýmanıtarlyq baılanysty nyǵaıtý.
Prezıdent Qasym-Jomart Toqaev asyl tuqymdy aqaltekeden týǵan qulyndarǵa Aqnıet jáne Bórte degen esim bergenin jazǵan edik.
