Qazaqstandyq muǵalimder men oqýshylardyń derekteri ınternetke tarap ketken
SEMEI. KAZINFORM — Semeı qalasynyń prokýratýrasy bilim berý uıymdarynda derbes derekter týraly zańnama talaptarynyń saqtalýyna qatysty zań buzýdy anyqtady.
Anyqtalǵandaı, 31 mekteptiń resmı saıttarynda qyzmetkerler men bilim alýshylardyń derbes derekteri qamtylǵan qujattar ashyq qoljetimdilikte ornalastyrylǵan.
— 3 752 qyzmetkerdiń aty-jóni, JSN-i, týǵan kúnderi, turǵylyqty mekenjaılary jáne baılanys telefondary, sondaı-aq 344 kámeletke tolmaǵan bala týraly málimetter jarııalanǵan, — delingen Abaı oblysynyń prokýratýrasy habarlamasynda.
Mundaı málimetterdi ornalastyrý jeke ómirge qol suǵylmaýshylyqtyń buzylýyna jáne olardyń zańsyz paıdalanylýyna qaýip tóndirgen.
Prokýrorlyq qadaǵalaý aktisi boıynsha zańsyz ornalastyrylǵan málimetter ashyq qoljetimdilikten alynyp tastaldy, kináli tulǵalar zańda belgilengen jaýapkershilikke tartyldy.
Aıta ketelik alaıaqtar 4 kúnde 150 myń SMS taratyp, azamattardyń aqshasy men jeke deregin ıemdenbek bolǵany týraly jazǵan edik.
