Qazaqstandyq mıllıarder «Tobyl» fýtbol klýbynyń bas quryltaıshysy boldy

ASTANA. KAZINFORM – Qostanaılyq «Tobyl» fýtbol klýbynyń jańa quryltaıshysy paıda boldy. Bul jóninde klýbtyń baspasóz qyzmeti málimdedi. 

– Prezıdent Qasym-Jomart Kemeluly Toqaevtyń fýtboldy kommertsııalandyrý jónindegi tapsyrmasyna sáıkes, ERG Dırektorlar Keńesiniń tóraǵasy – Bas atqarýshy dırektory Sh. Ibragımov qostanaılyq «Tobyl» fýtbol klýbynyń jańa bas quryltaıshysy atanady. Mundaı iri ári senimdi seriktestiń qoldaýymen «Tobyl» komandasy jańa jetistikterge jetýge múmkindik alady, - delingen habarlamada.

Aıta keteıik, qostanaılyq klýb bıyl Qazaqstan sýperkýbogyn ıelendi. Qazaqstandyq maman Nurbol Jumasqalıev jattyqtyratyn komanda almatylyq «Qaıratty» penaltıler serııasynda jeńip, jańa maýsymdaǵy alǵashqy júldelerine qol jetkizdi.