Qazaqstandyq Mıhaıl Kýkýshkın Shveıtsarııadaǵy týrnırdiń shırek fınalyna shyqty

ASTANA. KAZINFORM — Qazaqstandyq, álemniń 140-raketkasy Mıhaıl Kýkýshkın Lýgano (Shveıtsarııa) chellendjer týrnıriniń shırek fınalyna shyqty.

Dodanyń 5-raketkasy bolyp tirkelgen 36 jastaǵy qazaqstandyq sportshy ekinshi aınalymda dúnıejúzilik reıtıngide 181-orynda turǵan ulybrıtanııalyq Bıllı Harrıske qarsy keldi.

Birinshi partııada 29 jastaǵy B.Harrıs 6:2 esebimen basymdyq kórsetti. Esesine ekinshi sette M.Kýkýshkın ese qaıtardy – 6:3. Sheshýshi, úshinshi partııany tennısshiler breık almasýmen bastady – 1:1. Budan keıin Mıhaıl qatarynan bes geımdi aldy – 6:1.

Eki saǵatqa jýyq ýaqytqa sozylǵan báseke barysynda Kýkýshkın 4 eıspen birge 7 breık-poınttyń beseýin múlt jibermedi. Harrıs 11 eıs, 3 breıkpen (6 breık-poınt) kózge tústi. Osylaısha, buǵan deıin Manama (Bahreın) men Tenerıfe (Ispanııa) chellendjer jarystarynda chempıon atanǵan Mıhaıl Kýkýshkın jeńis serııasyn 14 matchqa jetkizdi.

M.Kýkýshkın ATP Live reıtıngisinde qazirgi sátte 134-orynǵa kóterilip tur.

Qazaqstandyq tennısshi Lýgano jartylaı fınalyna shyǵý úshin álemniń 122-inshi, osy jarystyń 1-raketkasy, belgııalyq Zızý Bergspen talasady.

Eske sala keteıik, budan buryn Dmıtrıı Popkonyń qatarynan 20 oıynda jeńiske jetkenin jazǵan bolatynbyz.