Qazaqstandyq mektep dırektorlary Qytaıdyń bilim júıesindegi JI tájirıbesin meńgerdi
ASTANA. KAZINFORM – Qazaqstandyq mektep dırektorlary Qytaıda ótken halyqaralyq semınarda jasandy ıntellektti bilim berý júıesine engizýdiń ozyq tájirıbesimen tanysty, dep habarlaıdy Oqý-aǵartý mınıstrligi.
Qytaı Halyq Respýblıkasynyń Úrimshi qalasynda ótken «Jasandy ıntellekt tehnologııalaryn bilim berý júıesinde qoldaný» halyqaralyq semınaryna Qazaqstannan «Keleshek mektepteri» jobasynyń 50-ge jýyq dırektory qatysty.
Semınar barysynda qatysýshylar qytaılyq áriptesterimen tájirıbe almasyp, bilim berý uıymdaryn basqarýdyń zamanaýı tásilderin zerdeledi. Sondaı-aq tsıfrlyq sheshimderdi paıdalaný, jasandy ıntellekt quraldaryn bilim berý úderisine engizý jáne mektepter men joǵary oqý oryndary arasyndaǵy tıimdi yntymaqtastyq úlgilerimen tanysty.
«Semınar qorytyndysy boıynsha zerdelengen tájirıbelerdi "Keleshek mektepteriniń" jumysyna kezeń-kezeńimen engizý, sondaı-aq qazaqstandyq jáne qytaılyq bilim berý uıymdary arasyndaǵy kásibı yntymaqtastyqty jalǵastyrý josparlanýda», – dep habarlaıdy mınıstrlik.
Aıta keteıik, Býrabaı qazaqstandyq jastardyń ǵylymı alańyna aınaldy.
