Qazaqstandyq medıtsınalyq platforma StartX baǵdarlamasyna irikteldi
ASTANA. KAZINFORM — Astana Hub ekojúıesiniń qatysýshysy Defect AI Stenford ýnıversıteti StartX akseleratsııalyq baǵdarlamasynyń 2026 jylǵy kóktemgi legine ótti. Bul baǵdarlama Kremnıı alqabyndaǵy básekege qabiletti jobalardyń biri, dep habarlaıdy JI jáne tsıfrlyq damý mınıstrligi.
Kompanııa medıtsınalyq uıymdarǵa qujattamany QR Densaýlyq saqtaý mınıstrliginiń buıryqtary men klınıkalyq hattamalaryna sáıkes júrgizýge kómektesetin ıntellektýaldy platformany jasady. Júıe jazbalardy birneshe sekýnd ishinde taldaıdy jáne qolmen tekserý ýaqytyn 95%-ǵa deıin qysqartady, bul dárigerlerge qaǵazbastylyqtan arylyp, naýqastarǵa kóńil bólýge múmkindik beredi. Platformanyń basty maqsaty — klınıkalardy qoldanystaǵy standarttar men normatıvtik talaptar týraly habardar etý. Nátıjesinde medıtsınalyq qujattama sapasy jaqsaryp, medıtsınalyq kómek kórsetý deńgeıi artady.
Qazirgi tańda platforma ondaǵan mıllıon medıtsınalyq jazbalardy tekserdi. Ónimdi Qazaqstandaǵy 30-dan astam klınıka qoldanady, onyń ishinde iri jeliler de bar. Defect AI ISO 27001 standarty boıynsha sertıfıkattalǵan jáne HIPAA talaptaryna sáıkes keledi.
Komanda álemdik úzdik tájirıbelerdi paıdalanyp, platformaǵa aqyldy izdeý fýnktsııasyn engizdi: dáriger birneshe sekýnd ishinde Densaýlyq saqtaý mınıstrliginiń resmı qujattary boıynsha emdeý ádistemesin tolyq kóre alady, burynǵydaı kóp bettik normatıvtik aktilerdi oqýdyń qajeti joq. Bul sheshimge OpenEvidence platformasy shabyt bergen — Defect AI komandasy onyń negizin qalaýshysymen Stenfordta kezdesken.
Halyqaralyq naryqta joba Rette brendimen damyp keledi, qazaqsha «retteý» degen sózden alynǵan, ıaǵnı «tártipke keltirý». Ataý ónimniń mánin kórsetedi: AI-assıstent medıtsınalyq uıymdarǵa qujattamany júıeli túrde retteýge kómektesedi, úlken kólemdegi medıtsınalyq jazbalardy sapasyna zııan keltirmeı jáne qosymsha qyzmetker almaı óńdeýge múmkindik beredi.
Qazaqstandaǵy tájirıbe komandaǵa densaýlyq saqtaý júıesiniń ishki jumysyn tereń túsinýge múmkindik berdi. Alaıda AQSh naryǵy múlde basqa: bul álemdegi eń úlken medıtsınalyq júıe — jyldyq kólemi shamamen 5 trln dollar, al medıtsınalyq saqtandyrý uıymdarynyń sany Qazaqstanmen salystyrǵanda myń ese kóp. 2025 jyldyń sońynda kompanııa alǵashqy ınvestıtsııalyq raýndty japty. Qazir komanda platformany AQSh naryǵyna beıimdep, alǵashqy amerıkandyq klıentterdi tirkep jatyr. Kelesi ınvestıtsııalyq raýndty 2026 jylǵy kóktemniń ortasyna josparlap otyr.
Komandanyń negizgi bóligi Qazaqstanda ornalasqan. Sonymen qatar AQSh, Japonııa, Ulybrıtanııa jáne Germanııada qyzmet etetin mamandar bar. Komandada Meta, Google jáne Microsoft kompanııalarynda tájirıbesi bar mamandar jumys isteıdi. Stenford ýnıversıtetimen ornatylǵan baılanystar arqyly kompanııa úzdik professorlarmen turaqty keńesip otyrady.
StartX arqyly komanda Advisory Board qurdy, oǵan praktık dárigerler, densaýlyq saqtaý salasyndaǵy ınvestorlar, sátti startap negizin qalaýshylar jáne medıtsınalyq jobalardy engizý tájirıbesi bar tehnık mamandar kirdi.
— StartX-qa túsý — búkil álemdegi myńdaǵan kásipkerlerdiń armany. Biz tórt ret ótinish berdik, sol arqyly 2026 jylǵy kóktemgi aǵymǵa endik. Bul jol komanda úshin shyńdalý tájirıbesi boldy. Biz ónimdi bastapqyda halyqaralyq naryqqa baǵyttaımyz dep josparlaǵandyqtan, Astana Hub qatysýshysy bolýdy sheshtik. Astana Hub-pen áriptestigimiz burynǵy startapymyz Sheberkhana — prototıpteý laboratorııasy kezeńinen bastalǵan. Sondaı-aq Astana Hub Ventures-ke jobamyzdy qoldaǵany jáne ınvestıtsııa salǵany úshin rızashylyǵymyzdy bildiremiz. Bizdiń mıssııamyz — densaýlyq saqtaý ákimshilik protsessterin jeńildetý, stımýldyq júıeni ádil etý jáne medıtsınalyq kómekti jaqsartý, — dedi Defect AI kompanııasynyń negizin qalaýshy Sanjar Myrzaǵalym.
Quryltaıshylardyń aıtýynsha, StartX baǵdarlamasy óte qarqyndy ótip jatyr. Baǵdarlamanyń negizgi ereksheligi — qaýymdastyq mádenıeti. Árbir startaptyń negizin qalaýshy StartX arqyly ótken kásipkerlerdiń keń qoldaýyna súıene alady jáne óz kezeginde basqalarǵa kómektesýge daıyn bolady.
Kóktemgi lekke irikteý birneshe kezeńnen ótti: tehnologııalyq jáne bıznes saraptamalardan ótti, ony Astana Business Campus jáne Nazarbaev Ýnıversıteti qoldady. Baǵdarlamaǵa qatysý StartX pen Astana Business Campus arasyndaǵy Platinum Agreement arqasynda múmkin boldy, ol NU Impact Foundation ekojúıesine kiredi.
Defect AI jobasynyń AQSh-tyń jetekshi akseleratsııalyq baǵdarlamalarynyń birine ótýi Qazaqstandyq tehnologııalyq sheshimderdiń álemdik naryqta básekege qabiletti ekenin dáleldeıdi jáne komanda úshin halyqaralyq damýdyń jańa kezeńin ashady. Buryn joba Silicon Valley Residency baǵdarlamasynyń tabysty túlegi bolǵan, ony QR Jasandy ıntellekt jáne tsıfrlyq damý mınıstrligi, Ózbekstan Respýblıkasynyń Tsıfrlyq tehnologııalar mınıstrligi, Astana Hub, Astana Hub Ventures, IT Park Uzbekistan jáne IT Park Ventures birlesip júzege asyrǵan.
Budan buryn ym tilin qazaqshalaǵan startap brıtandyq Tatler jýrnalynyń syılyǵyn jeńip alǵanyn jazǵanbyz.