Qazaqstandyq maı zaýyttary Shanhaıda 108 mln AQSh dollaryna kelisimshart jasady
ASTANA. KAZIFORM – Qazaqstannyń maı jáne maı ónimderin óndirýshi kásiporyndary Shanhaı qalasynda ótip jatqan 9-shy Qytaı halyqaralyq ımport kórmesi (CIIE) aıasynda jalpy somasy 108 mln AQSh dollaryn quraıtyn kelisimderge qol qoıdy, dep habarlaıdy QR aýyl sharýashylyǵy mınıstrliginiń baspasóz qyzmeti.
Qazaqstannyń ulttyq pavılonynda Maıly daqyldardy óńdeýshilerdiń ulttyq qaýymdastyǵy men otandyq toǵyz maı zaýyty maı óńdeý salasynyń ónimderin tanystyrdy.
Qaýymdastyq ókilderiniń aıtýynsha, bul kórme iskerlik baılanystardy nyǵaıtýǵa, jańa seriktester tabýǵa jáne Qytaımen saýda-ekonomıkalyq yntymaqtastyqty keńeıtýge múmkindik beretin tıimdi alań.
-Biz bul kórmege tórt jyl qatarynan qatysyp kelemiz. Osy ýaqyt ishinde jańa seriktester taýyp, birqatar kelisimshartqa qol qoıdyq, – dedi Maıly daqyldardy óńdeýshilerdiń ulttyq qaýymdastyǵy ókilderi.
Kórme aıasynda «Shyńjańǵa ınvestıtsııa salyńyz» atty tanystyrylym sharasy ótip, oǵan Qytaı Halyq Respýblıkasynyń Shyńjań-Uıǵyr avtonomııalyq aýdany Halyq úkimeti bas hatshysynyń orynbasary Sıýı Baıke men Qazaqstannyń Shanhaı qalasyndaǵy bas konsýly Nurlan Aqqoshqarov qatysty. Іs-shara barysynda Qaýymdastyqtyń atqarýshy dırektory Aleksandr ıAshkov qatysýshylarǵa Qazaqstannyń maı ónerkásibiniń damý bolashaǵy men eksporttyq áleýeti týraly baıandady.
Onyń aıtýynsha, salada qarqyndy ósim baıqalady. Sońǵy bes maýsymda osy salada eksport kólemi bes esege artqan. 2025/2026 maýsymynyń qorytyndysy boıynsha eksport kólemi 1,8 mln tonnadan asyp, eksporttan túsken kiris 1 mlrd 233 mln AQSh dollaryna jetken. Bul kórsetkish te bes esege ósken.
Jalpy, qazaqstandyq maı ónimderi álemniń 20-dan astam eline eksporttalady. Olardyń qatarynda Qytaı, Ortalyq Azııa memleketteri, Eýropalyq odaq elderi jáne Taıaý Shyǵys bar. Qytaı otandyq ónimdi ımporttaýshy iri elderdiń arasynda ekinshi orynda tur. Sonymen qatar bul naryqta suranys ta óte joǵary. Sońǵy bes maýsymda Qazaqstannan Qytaıǵa eksporttalǵan ósimdik maılary, shrot pen kúnjaradan túsken valıýtalyq túsim 385 mln AQSh dollaryna artyp, 438 mln AQSh dollaryna jetti.
-Qazaqstandyq maı ónimderi Qytaı naryǵynda joǵary suranysqa ıe. Muny jyl saıyn mıllıondaǵan dollardy quraıtyn kelisimsharttardyń jasalýy da rastaıdy. Qytaı naryǵynyń aýqymdylyǵy eki el arasyndaǵy yntymaqtastyqty odan ári keńeıtýge zor múmkindik beredi. Atap aıtqanda, bıylǵy maýsymda Qytaıdyń ósimdik maılary, shrot pen kúnjara ımportynyń jalpy kólemi 16 mln tonnaǵa baǵalanyp otyr, – dep atap ótti Aleksandr ıAshkov.
Shanhaıda jasalǵan 108 mln AQSh dollaryna teń eksporttyq kelisimder Qazaqstan men Qytaı arasyndaǵy saýda-ekonomıkalyq yntymaqtastyqty nyǵaıtý jolyndaǵy kezekti mańyzdy qadam ekeni sózsiz.
Osyǵan deıin Qazaqstannyń maı ónimderi eksportyn 1,5 mlrd dollarǵa jetkizýdi kózdep otyrǵany týraly jazdyq.
