Qazaqstandyq mánerlep syrǵanaýshylar Beıjińde Olımpıada joldamasyna talasady

ASTANA. KAZINFORM – Qyrkúıek aıynda Qytaı astanasynda 2026 jylǵy Olımpıada oıyndaryna irikteý týrnıri ótedi. Bul – joldama alý úshin sońǵy múmkindik. Baıraqty básekege Qazaqstan quramasynyń ókilderi de qatysady. 

Ulttyq olımpıadalyq komıtettiń taratqan aqparatyna súıensek, qazirgi kezde qazaqstandyq mánerlep syrǵanaýshylarda eki joldama bar. 2025 jyly Bostonda ótken álem chempıonatynda Mıhaıl Shaıdorov pen Sofıa Samodelkına irikteý talabyn oryndap shyqqan edi. Sol sebepti bul joldamalar solarǵa bekitiledi deýge tolyq negiz bar (joldamalar jeke sportshyǵa emes, elge beriledi).

Eki sportshy da sózsiz ulttyq quramanyń kóshbasshylary sanalady. Shaıdorov álem birinshiliginde kúmis medal jeńip alǵan edi. Qazirdiń ózinde ol 2026 jylǵy Olımpıadada júlde úshin kúresetin basty úmitkerlerdiń qatarynda tur. 

Endigi kezekte Qazaqstan erler arasyndaǵy jekeleı saıysta jáne muzdaǵy bı boıynsha qosymsha kvota alýǵa tyrysady. Erler arasyndaǵy saıysqa Dıas Jırenbaev qatysady. Qosalqy quramda Nıkıta Krıvosheev, Oleg Melnıkov jáne Artýr Smagýlov bar. Muzdaǵy bıden Boısangýr Datıev pen Gaýhar Naýryzova el namysyn qorǵaıdy.

Jırenbaevtyń negizgi qarsylastarynyń qatarynda Hengem Kım (Ońtústik Koreıa), Fransýa Pıto (Frantsııa), Býrak Demırboga (Túrkııa), Maýrıtsıo Zandron (Avstrııa), Georgıı Reshtenko (Chehııa), Evgenıı Pýzanov (Belarýs), Donovan Karrılo (Meksıka), Semen Danılıants (Armenııa) bar.

Aıta keterligi, jeńiske jetý mindetti emes. Sebebi, týrnır qorytyndysy boıynsha úzdik bestikke kirý jetkilikti. Bul – aldaǵy jarystyń negizgi irikteý sharty.

Muzdaǵy bıden 20 jup óner kórsetedi. Datıev pen Naýryzovaǵa qarsylas bolatyndardyń qatarynda Italııa, Ispanııa, Qytaı, Grýzııa, Japonııa, Irlandııa, Vengrııa, Avstrııa jáne ózge de elderdiń juptary bar. 

Aıta keteıik, irikteý týrnıri Beıjińde 18-21 qyrkúıek aralyǵynda ótedi. 

Buǵan deıin «Barys» hokkeı klýby Astanada «Sıbır» komandasymen eki baqylaý oıynyn ótkizetinin jazǵan edik.