Qazaqstandyq mamandar shahtadaǵy apatty jyldam anyqtaıtyn júıe jasap shyǵardy

ASTANA. KAZINFORM — Qazaqstandyq mamandar tsıfrlyq monıtorıng jáne basqarý júıesin oılap tapty. Álemde teńdesi joq júıeniń kómegimen apattyq jaǵdaılar týraly jedel habarlap, shahterlerge tótenshe jaǵdaı týraly der kezinde eskertýge bolady.

— Bul júıe shahtalar men ónerkásiptik kásiporyndarda qaýipsizdikti arttyrý maqsatynda ázirlendi. Bizdiń negizgi modýlimiz — pozıtsııalaý júıesi. Onyń kómegimen jerdiń betindegi mamandar dál qazir shahta ishinde kim, qaı jerde ekenin, qansha adam bar ekenin jáne olardyń ornalasýyn baqylaı alady. Eger qandaı da bir apat, opyrylý bolsa, adamdardy tez arada tabý jáne qutqarý múmkindigi paıda bolady, — deıdi AG TECH jobalaý keńsesiniń dırektory Madına Aıtıeva.

Bul — tolyqtaı qazaqstandyq mamandar ázirlegen qural. Shahtada apat bolsa, dıspetcherler júıe arqyly shahta ishindegi qyzmetkerlerge bolǵan jaǵdaı týraly birden habarlaı alady. Nátıjesinde nysandaǵy shahterlerdiń jyldam evakýatsııalanýyna múmkindik týady.

— Mysaly, «ArselorMıttal» shahtasyndaǵy apatty aıtaıyq. Sol kezde 50-ge jýyq adam qaza tapty. Apattan keıin olardy tabý óte qıyn boldy, sebebi qaıdan izdeý keregin eshkim bilgen joq. Eger sol jerde pozıtsııalaý júıesi bolsa, izdeý radıýsy bir shaqyrymǵa deıin qysqarar edi. Bizdiń pozıtsııalaý júıemiz 20 metrge deıingi dáldikpen anyqtaýǵa múmkindik beredi, — deıdi Madına Aıtıeva.

Sonymen qatar júıe shahtadaǵy aýanyń jaǵdaıyn da avtomatty túrde ólshep otyrady. Qazirgi tańda qaýipsizdikti qamtamasyz etetin baǵdarlamany elimizdiń 30-dan astam iri kompanııasy kásiptik qoldanysqa engizgen. Onyń ishinde «Qaztsınk», Qarmet  jáne «Qazaqmys» kásiporyndary da bar.

Aıta keteıik, birneshe kún buryn ǵana Aqtóbedegi «Bolashaq» shahtasyndaǵy apattan bir adam qaza tapqanyn habarlaǵan edik. 

Al 17 aqpan kúni Ulytaý oblysyndaǵy «Jomart» kenishinde apat bolyp, 7 adam ajal qushqan.