Qazaqstandyq mamandar Reseıdiń ozyq qubyr tehnologııalarymen tanysty
ASTANA. KAZINFORM — Qazaqstandyq mamandar Batys Sibirge issaparmen baryp, qubyr tasymaly salasyndaǵy ozyq tájirıbeni zerttedi.
«KMG PetroChem» jáne «QazTransOıl» kompanııalary uıymdastyrǵan bul sapar Qazaqstandaǵy polımer óndirisin damytý jobalaryn júzege asyrý aıasynda ótti.
«KMG PetroChem» JShS basqarma tóraǵasy Igor Ilın kompanııanyń qazirgi ýaqytta KPI polıpropılen óndirisi men «Sılleno» polıetılen keshenine deıin magıstraldyq qubyr salý jobasyn qolǵa alyp jatqanyn atap ótti.
— Biz qubyr jelisin salýdyń jobalaý kezeńindemiz. Qazaqstanda dál osyndaı ınfraqurylym ázirge joq. Sondyqtan strategııalyq seriktesimiz — SIBÝR kompanııasynyń tájirıbesin zertteý biz úshin asa mańyzdy, — dedi ol.
«QazTransOıl» zertteý jáne damý ortalyǵynyń dırektory Sábıt Arynov reseılik tájirıbeniń Qazaqstan úshin paıdaly bolatynyn aıtty.
— Biz munaı qubyrlary men kómirsýtekter tasymaldaıtyn qubyrlardy paıdalanýda kóptegen uqsastyqtardy baıqadyq. Reseılik áriptesterimizdiń tájirıbesi bizdiń jańa jobalarymyzdy júzege asyrýda úlken kómek bolady, — dedi ol.
Sapar barysynda qazaqstandyq mamandar Batys Sibirdegi birqatar iri óndiristik nysandardy aralap, qubyr jelilerin basqarýdyń zamanaýı júıelerimen jáne tsıfrlyq tehnologııalarymen tanysty. Alynǵan tájirıbe Qazaqstandaǵy jańa gaz-hımııa jobalaryn damytýda qoldanylmaq.
Aıta keteıik, Qazaqstanda qazirgi ýaqytta iri gaz-hımııa jobalary júzege asyrylyp jatyr. Olardyń qatarynda Atyraý oblysyndaǵy polıpropılen óndirisi jáne «Sılleno» polıetılen kesheni bar. Bul jobalar elimizdiń munaı-gaz hımııasy salasyn damytýǵa baǵyttalǵan.