Qazaqstandyq mamandar Ózbekstanda sý únemdeý tehnologııalaryn ıgerip jatyr
TAShKENT. KAZINFORM – Qazaqstan men Ózbekstannyń sý sharýashylyǵy mamandary sý únemdeý tehnologııalaryn damytý boıynsha tájirıbe almasyp jatyr, dep habarlaıdy Kazinform agenttiginiń menshikti tilshisi.
Aıta keteıik, bıyl qańtarda Qazaqstan men Ózbekstannyń sý sharýashylyǵy mınıstrleri únemdeý tehnologııalaryn damytý úshin birlesken semınarlar ótkizýge ýaǵdalasqan bolatyn. Sol kelisimniń negizinde qazaqstandyq mamandar Tashkenke kelip, ózbek tarapynyń tyń tásilderimen tanysyp jatyr.
— Munda biz tájirıbe almasyp jatyrmyz. Atap aıtqanda, sý únemdeý tehnologııalaryn ıgerý protsesi, tıimdi tásilderdi engizýdi úırený ústindemiz. Bul rette Ózbekstanda sý shyǵynyn qysqartý boıynsha qolǵa alǵanǵan jobalarmen tanystyq. Osy tehnologııalardy ıgerip, Qazaqstanda engizýdi josparlap otyrmyz, - dedi QR Sý resýrstary jáne ırrıgatsııa mınıstrliginiń Tarıftik saıasat departamenti dırektorynyń orynbasary Qanat Oralov.
Tájirıbesimen bólisken ózbekstandyq maman Sabıdjon Mamatov Ortalyq Azııadaǵy muzdyqtardyń erý qarqyny joǵary ekenin atap ótti. Onyń sózinshe, aımaq elderi búginnen bastap sý únemdeýge den qoıǵany abzal.
— Ózbekstan sý únemdeý tehnologııalaryn engizýge erekshe mán beredi. Biz qazaqstandyq áriptesterimizge bul salany qalaı damytyp jatqanymyz jaıly aıtyp berdik. Biz qalasaq ta, qalamasaq ta Ortalyq Azııada sý tapshylyǵy bolady. Búginge deıin muzdyqtardyń 30%-y erip ketti. Sondyqtan qazirden qam jasaý mańyzdy. Bul baǵytta eń tıimdi tásil — sý únemdeý tehnologııalaryn engizý, - dedi ÓR Sý basqarý ulttyq jobasynyń mamany Sabıdjon Mamatov.
Eske salaıyq, buǵan deıin ózbekstandyq kompanııalar Qazaqstanda sý únemdeý tehnologııalaryn engizýmen aınalysýy múmkin ekenin jazyp edik.
Sonymen qatar bıyl qańtarda ózbekstandyq áriptesimen kezdesken QR Sý resýrstary jáne ırrıgatsııa mınıstri Nurjan Nurjigitov resmı Astana men Tashkent sý bólý kelisiminiń jobasyn ázirlep jatqanyn málim etti.
Munymen birge, Qazaqstan men Ózbekstan Syrdarııa boıyna sý esepteıtin qurylǵylar ornatýdy bıyl aıaqtaýdy josparlap otyr.