Qazaqstandyq dárigerler Núkis qalasyndaǵy Endokrınologııa ortalyǵynyń jumysymen tanysty
ASTANA. KAZINFORM — Halyqaralyq yntymaqtastyqty nyǵaıtý baǵdarlamasy jáne Ózbekstandaǵy Qazaqstan medıtsınasy kúnderi aıasynda Kardıologııa jáne ishki aýrýlar ǵylymı-zertteý ınstıtýty men Qaraqalpaqstannyń Núkis qalasyndaǵy Endokrınologııa ortalyǵy qyzmetkerleriniń kezdesýi ótti. Bul týraly QR Densaýlyq saqtaý mınıstrligi habarlady.
Kezdesý barysynda Tashkent qalasyndaǵy akademık E. Týrakýlov atyndaǵy respýblıkalyq mamandandyrylǵan ǵylymı-tájirıbelik endokrınologııa medıtsınalyq ortalyǵy men onyń Núkis qalasyndaǵy fılıaly arasynda yntymaqtastyq týraly memorandýmdarǵa qol qoıyldy.
Kelisim qant dıabeti men endokrındik aýrýlardy dıagnostıkalaý, emdeý jáne aldyn alý salasyndaǵy yntymaqtastyqty keńeıtýge, sondaı-aq mekemeler arasyndaǵy ǵylymı jáne bilim berý ıntegratsııasyn kúsheıtýge baǵyttalǵan.
— Qazaqstandyq mamandar Endokrınologııa ortalyǵynyń jumysymen tanysyp, dıabetologııa men endokrınologııa salalaryndaǵy ózekti máseleler boıynsha semınarlar ótkizdi. Qazaqstanda qant dıabetimen aýyratyn naýqastarǵa kómek kórsetý, ınnovatsııalyq emdeý ádisterin engizý, sonyń ishinde ınsýlındik pompalardy paıdalaný men glıýkoza deńgeıin zamanaýı tehnologııalar arqyly baqylaý tájirıbesi jáne jetistikterimen bólisti, — delingen aqparatta.
Hırýrg Tımýr Ekibaev professor, hırýrg Telman Kamalovpen birlesip operatsııa júrgizdi. Olar qant dıabetiniń asqynýy — dıabettik aıaq sındromyn emdeýdiń jańa ádisteri men ampýtatsııanyń aldyn alý joldaryn talqylady.
Qalqansha bez aýrýlaryn erte dıagnostıkalaý máselelerine erekshe kóńil bóldi. Interventsııalyq hırýrg-radıolog Arman Ibraev Kardıologııa jáne ishki aýrýlar ǴZI-de qalqansha bezdiń qatersiz túzilisterine radıojıilikti ablıatsııa ádisin engizý nátıjeleri týraly aıtyp berdi.
Osyǵan deıin Qazaqstan medıtsınalyq týrızmdi damytatyny týraly jazdyq.