Qazaqstandyq mamandar Qytaıdyń sý únemdeý tehnologııalaryn zerdelep jatyr
ASTANA. KAZINFORM- Qazaqstandyq sý salasynyń 25 mamany Qytaı Halyq Respýblıkasynda ırrıgatsııa júıelerin jańǵyrtý, sý sharýashylyǵyna zamanaýı tehnologııalardy engizý jáne shaǵyn gıdroenergetıkany damytý baǵyttary boıynsha bilim alyp jatyr, dep habarlaıdy QR Sý resýrstary jáne ırrrıgatsııa mınıstrliginiń baspasóz qyzmeti.
Oqý is-sharalaryn Qytaı Halyq Respýblıkasy Sý resýrstary mınıstrliginiń Aýyldyq jerlerdi elektrlendirý ǵylymı-zertteý ınstıtýty jáne Shaǵyn gıdroenergetıka jónindegi Azııa-Tynyq muhıty oqý-zertteý ortalyǵy (HRC) uıymdastyrǵan.
14 qazanda «Bir beldeý – bir jol» bastamasyna qatysýshy elderge arnalǵan sý resýrstaryn basqarý jáne ekologııalyq ornyqty shaǵyn gıdroenergetıkany damytý» jáne «Damýshy elderge arnalǵan sý sharýashylyǵy tehnologııalary» taqyryptaryndaǵy semınarlar bastaldy. Oqý is-sharalary 27 qazanǵa deıin jalǵasady.
Buǵan deıin, 9-22 qyrkúıek aralyǵynda Hanchjoý qalasynda «Bir beldeý – bir jol» bastamasyna qatysýshy elderge arnalǵan ırrıgatsııa aýdandaryn salý jáne basqarý» jáne «Azııa elderine arnalǵan iri jáne orta ırrıgatsııa aýdandaryn jańǵyrtý jáne ornyqty damytý» taqyryptarynda semınarlar ótken.
Qazaqstandyq mamandar Qytaıdyń ırrıgatsııa ınfraqurylymyn salý, jańǵyrtý jáne paıdalaný, sý únemdeý tehnologııalaryn engizý, sondaı-aq aýyl sharýashylyǵynda sýdy paıdalaný tıimdiligin arttyrý baǵytyndaǵy tájirıbesin zerdelep jatyr. Irrıgatsııa aýdandaryn jańǵyrtýǵa, sýdy esepke alý tehnologııalaryna, sorǵy stantsııalarynyń jumysyna jáne sýarý júıelerin basqarýda tsıfrlyq sheshimderdi qoldanýǵa erekshe nazar aýdarylyp otyr.
Sonymen qatar ornyqty damýdy qamtamasyz etý jáne sý resýrstaryn saqtaý maqsatynda shaǵyn sý elektr stantsııalaryn salý men olardy tıimdi paıdalaný jónindegi Qytaı tájirıbesi de qarastyrylýda.
Baǵdarlama teorııalyq sabaqtar men tájirıbelik nysandarǵa barýdy qamtıdy. Qatysýshylar sý sharýashylyǵy ınfraqurylymyn paıdalaný jáne jańǵyrtý tájirıbesimen, sondaı-aq sý resýrstaryn basqarýdyń zamanaýı tehnologııalaryn qoldaný tásilderimen tanysady. Semınarlar aıasynda ırrıgatsııa júıelerin damytý, sý únemdeý jáne sýdy tıimdi basqarý máseleleri boıynsha qytaılyq sarapshylarmen tájirıbe almasý da uıymdastyryldy.
-Baǵdarlama teorııalyq sabaqtar men tájirıbelik nysandarǵa barýdy qamtıdy. Qatysýshylar sý sharýashylyǵy ınfraqurylymyn paıdalaný jáne jańǵyrtý tájirıbesimen, sondaı-aq sý resýrstaryn basqarýdyń zamanaýı tehnologııalaryn qoldaný tásilderimen tanysady. Semınarlar aıasynda ırrıgatsııa júıelerin damytý, sý únemdeý jáne sýdy tıimdi basqarý máseleleri boıynsha qytaılyq sarapshylarmen tájirıbe almasý da uıymdastyryldy, – dedi Sý resýrstary jáne ırrıgatsııa vıtse-mınıstri Talǵat Momyshev.
Osyǵan deıin elimizde sý resýrstaryn qalaı utymdy paıdalanýǵa bolatyny týraly jazdyq.
