Qazaqstandyq 200 maman Qytaıda oqýdan ótip, sýdyń lastanýyn tejeý tásilderin meńgeredi
ASTANA. KAZINFORM – Qazaqstandyq sý sharýashylyǵy salasy mamandarynyń alǵashqy legi biliktilikti arttyrý kýrstarynan ótý úshin Qytaıǵa attandy.
Oqý baǵdarlamasy «Qazsýshar» RMK men Power China International Group Limited kompanııasy arasyndaǵy ózara túsinistik jáne yntymaqtastyq týraly memorandým, sondaı-aq QR Sý resýrstary jáne ırrıgatsııa mınıstrligi men QHR Sý sharýashylyǵy mınıstrligi arasyndaǵy memorandým aıasynda uıymdastyrylyp otyr.
Mınıstrlik málimetinshe, oqý Qytaıdyń Chansha qalasynda ótip jatyr. Barlyq shyǵyndy Qytaı tarapy óz moınyna alǵan. Kýrstyń negizgi taqyryby – «Qazaqstandaǵy sý resýrstaryn paıdalaný jáne sý ortasynyń lastanýymen kúres». Alǵashqy top quramynda 34 maman bar. Jalpy jyl sońyna deıin Qytaıda shamamen 200 qazaqstandyq maman oqýdan ótedi dep josparlanǵan.
– Baǵdarlama aıasynda sý resýrstaryn basqarý, lastanýynyń aldyn alý jáne baqylaý, aǵyn sýdy tazartý men qaıta paıdalaný tehnologııalary, sondaı-aq gıdrotehnıkalyq qurylys salasynda zamanaýı tehnologııalar men jasandy ıntellektini qoldaný boıynsha dárister ótkizý josparlanǵan. Sonymen qatar mamandar Qytaıdyń sý sharýashylyǵy jáne qalalyq ınfraqurylym salasyndaǵy tájirıbesin zerdeleý úshin Chansha, Shenchjen jáne Gýanchjoý qalalaryna barady, - dedi Sý resýrstary jáne ırrıgatsııa mınıstri Nurjan Nurjigitov.
Eske salsaq, byltyr Power China kompanııasynyń bazasynda 125 qazaqstandyq sý mamany biliktilikti arttyrý kýrstarynan ótken bolatyn. Nátıjesinde QR Sý resýrstary jáne ırrıgatsııa mınıstrligi men Qytaı tarapy birlesken bilim berý baǵdarlamasyn bıyl da jalǵastyrýǵa kelisti.
Aýyl sharýashylyǵynda sý únemdeıtin tehnologııalardy belsendi engizý qajet. Bul týraly Úkimet otyrysynda Premer-mınıstri Oljas Bektenov aıtty.
