Qazaqstandyq kvartet álem sahnalarynda: sheteldikter qazaq mýzykasyna tánti

ASTANA. KAZINFORM — Qazaq kompozıtorlarynyń shyǵarmalaryn sheteldik tyńdarmandar tamsanyp tyńdaıdy. Bul týraly «Búgin LIVE» baǵdarlamasyna suhbat bergen Ǵazıza Jubanova atyndaǵy memlekettik fılarmonııanyń ishekti aspaptar kvartetiniń músheleri málimdedi.

— Biz 30 jyldan beri álemdi aralap júrmiz. Al bıyl erekshe kontserttik týrymyz boldy. Álemdik deńgeıdegi ekiniń biri shyǵa bermeıtin sahnalarda óner kórsettik. Bul kontserttik týrǵa 1 jyldan astam ýaqyt boıy erekshe daıyndaldyq. Josparlaǵan is júzege asyp jatqan kezde kóńil-kúı ornyna túsedi, biraq odan keıin de basqa belester shyǵa beredi, — deıdi Ǵazıza Jubanova atyndaǵy memlekettik ishekti aspaptar kvartetiniń kórkemdik jetekshisi Ernar Myńtaev.

Jaqynda ǵana álemdik týrdan oralǵan ónerpazdar stýdııa tórinde áserlerin ortaǵa saldy.

— Bul atmosferasy bólek, erekshe sahnalar. Eń áýeli Frantsııanyń Parıj qalasynan bastadyq. Álemniń eń úzdik mýzykanttarymen birge bir sahnada óner kórsettik. Elimizdiń abyroıyn ústemdettik dep aıtýǵa bolady. Basynda qobaljý bolady. Biraq sahnaǵa shyqqannan keıin rahatqa berilip, tyńdarmannyń kóńiline áýenniń bárin jetkizgimiz keledi, — deıdi Ǵazıza Jubanova atyndaǵy memlekettik ishekti aspaptar kvartetiniń múshesi Bekzat Saılaýbaıuly.

Stýdııa qonaqtary sheteldik tyńdarmandardyń qazaq shyǵarmalaryna degen erekshe yqylasyna toqtaldy.

— Bizdiń kvartetimizdiń maqsaty — qazaqtyń áýenin, qazaqtyń mýzykasyn álemge taratý, tanytý. Sol maqsatymyzdy oryndap júrmiz. Qazaq kompozıtorlarynyń kúılerin, jas talanttardyń shyǵarmalaryn oryndaǵanda tyńdarmandar erekshe áser alyp, rahattanyp tyńdap, kontsertten keıin kelip, qazaqtyń shyǵarmalaryn maqtap aıtady, — deıdi olar.

Aıta keteıik, bıyl qazaq mýzyka ónerindegi erekshe ujym — Ǵazıza Jubanova atyndaǵy memlekettik fılarmonııanyń ishekti aspaptar kvartetiniń memlekettik mártebege ıe bolǵanyna 30 jyl tolyp otyr.

— Kontserttik týrymyzdan kele salyp, elimizdegi túrli sharalarǵa qatysyp jatyrmyz. 21 jeltoqsanda ózimizdiń taǵy bir kontsertimiz bolady. Astanadaǵy memlekettik fılarmonııada óz keshimiz ótedi. Onda erekshe baǵdarlamalar bolady. Jańa jyl qarsańyndaǵy atmosfera. Bizde ádette batystyq kompozıtorlardyń shyǵarmalary qoıylady. Bul keshtiń ereksheligi — qazaq kompozıtorlarynyń shyǵarmalaryn, kúılerin oryndaımyz. Sol keshke astanalyqtar men qala qonaqtaryn shaqyramyz. Jaqsy keshtiń kýási bolsyn, — deıdi Ǵazıza Jubanova atyndaǵy memlekettik ishekti aspaptar kvartetiniń kórkemdik jetekshisi.

Eske salaıyq, birer kún buryn Ǵ.Qurmanǵalıev atyndaǵy BQO fılarmonııasyna akademııalyq ataǵy berildi.