Qazaqstandyq qutqarýshylar jasaǵy Aýǵanstanǵa ketti
Qazaqstan TJM qutqarýshylary jer silkinisi saldaryn joıýǵa kómek kórsetý úshin Aýǵanstanǵa jiberildi. Tıisti tapsyrmany Qazaqstan Prezıdenti Qasym-Jomart Toqaev júktedi, dep habarlaıdy Kazinform agenttigi.
Tótenshe jaǵdaılar mınıstrligi izdestirý-qutqarý jumystaryn júrgizý úshin 45 adamnan qurylǵan kúshter men quraldar tobyn ázirlikke keltirdi.
"Olardyń arasynda Respýblıkalyq jedel-qutqarý jasaǵynyń qutqarýshylary, kınologııalyq eseptoby, Apattar medıtsınasy ortalyǵynyń dárigerleri men feldsherleri bar. Bular - qutqarý operatsııalarynda kópjylǵy tájirıbesi bar bilikti mamandar. Birqatar qutqarýshylar men medıtsına qyzmetkerleri bıylǵy Túrkııadaǵy joıqyn jer silkinisi saldaryn joıýǵa qatysqan", - dep jazdy TJM-nan.
Top qajetti jabdyqtarmen qamtylǵan.
Topty Qazaqstan Respýblıkasy TJM Azamattyq qorǵanys jáne áskerı bólimder komıteti tóraǵasynyń mindetin atqarýshy Ularbek Ábikeev basqarady.
