Qazaqstandyq qutqarýshylar qansha adamdy aman alyp qaldy

8 myńnan astam adam qutqarylǵan

Elimizdiń azamattyq qorǵaý salasynda 29 myńnan astam maman qyzmet etedi. Olardyń qatarynda órt sóndirýshiler, súńgýirler, kınologtar, dárigerler men psıhologtar bar. Árqaısysynyń mindeti ártúrli bolǵanymen, ortaq maqsaty – tótenshe jaǵdaıdyń saldaryn azaıtyp, adam ómirin saqtap qalý.

Jyl basynan beri qutqarýshylar 70 myńnan astam shaqyrtýǵa shyǵyp, 8 myńnan astam adamdy qutqarǵan. Taǵy 9 myńnan astam adam qaýipti aımaqtardan evakýatsııalanyp, 3 myńǵa jýyq zardap shekken adamǵa medıtsınalyq kómek kórsetilgen. Elimizde jyl saıyn 18 myńnan astam tabıǵı jáne tehnogendik tótenshe jaǵdaı tirkeledi. Onyń shamamen 12 myńy – órt.

Mundaı júkteme qutqarýshylardan kásibı daıyndyqty, jedel áreket etýdi jáne kez kelgen jaǵdaıǵa ázir bolýdy talap etedi. Sondyqtan salada mamandardyń biliktiligin arttyrýmen qatar, tehnıkalyq múmkindikterdi jetildirýge de basymdyq berilip otyr.

Jańa tehnıka men mindetter

Saladaǵy jańarý qaýiptiń aldyn alý júıelerin jetildirýmen qatar, tehnıkalyq jaraqtandyrýdan da kórinedi. Qazir halyqqa tótenshe jaǵdaı týraly jedel habar beretin Mass Alert júıesi engizilip jatyr. Mundaı júıeler qaýip týraly aqparatty ýaqytyly jetkizýge jáne turǵyndardyń qajetti sharalardy erterek qabyldaýyna múmkindik beredi. Tehnıkany jańartý jumystary da kezeń-kezeńimen júrgizilýde.

– 2024–2026 jyldary Tótenshe jaǵdaılar mınıstrliginiń tehnıka parki 1 468 birlik tehnıkamen tolyqty. Onyń 700-i – órt sóndirý mashınalary. Buǵan qosa 45 órt sóndirý deposy men 16 qutqarý bólimshesi salynyp, 350-den astam nysan jańǵyrtylyp, jóndeýden ótti, – delingen vedomstvonyń aqparatynda.

Jańartý jumystary avıatsııany da qamtydy. Mınıstrlik alǵash ret ushaqtar men basqa da áýe kemelerin satyp alyp, parkin 13 zamanaýı áýe kemesimen tolyqtyrdy. Olar izdestirý-qutqarý jumystaryna, tabıǵı órtterdi sóndirýge, gýmanıtarlyq júkterdi jetkizýge jáne naýqastardy medıtsınalyq evakýatsııalaýǵa paıdalanylady. Sonymen qatar seısmıkalyq baqylaý júıeleri jańartylyp, ónerkásiptik qaýipsizdik sharalary kúsheıtildi.

Tehnıkalyq múmkindikterdiń artýymen birge mınıstrliktiń mindetteri de keńeıdi. Úkimettiń 2026 jylǵy 18 tamyzdaǵy qaýlysymen shaǵyn kólemdi kemelerdiń qaýipsiz paıdalanylýyn baqylaý, qujattaryn tekserý jáne zań buzýshylyqtardyń aldyn alý mindetteri qosyldy. Al Almatyda apatqa ushyraǵan týrısterge kómek kórsetý «Barys» respýblıkalyq qutqarý qyzmetine júkteldi. Bul ózgerister azamattyq qorǵaý salasynyń mindetteri tótenshe jaǵdaıdyń saldaryn joıýmen ǵana shektelmeıtinin kórsetedi.

Adam ómirine arasha túsetin mamandar

Tehnıkanyń jańarýy men jańa júıelerdiń tıimdiligi tótenshe sátte durys sheshim qabyldaıtyn mamandardyń biliktiligine de baılanysty. Olardyń biri zardap shekkenderge medıtsınalyq kómek kórsetse, endi biri joǵalǵan adamdardy izdeıdi. Al kómekke shaqyrǵan azamattardyń qońyraýyn dıspetcherler qabyldap, qajetti qyzmetterdi oqıǵa ornyna baǵyttaıdy. Osyndaı mamandardyń árqaısysy qutqarý jumystarynyń óz mindetine saı kezeńin atqarady.

Astana qalasy boıynsha Apattar medıtsınasy ortalyǵy fılıalynyń feldsheri Erkebulan Myrzabekov Qaraǵandy oblysynyń Qarqaraly aýdanyndaǵy tabıǵı órt kezinde jaýapty mindet atqarǵan. Órt saldaryn joıý barysynda qaýipti aımaqtan 18 bala men alty eresek adam, onyń ishinde úsh júkti áıel evakýatsııalandy. Al Erkebulan Qanaı-1 qystaǵyna jiberilip, ıis tıip ýlanǵan bes adamǵa alǵashqy medıtsınalyq kómek kórsetti.

Zardap shekkender aýrýhanaǵa jatýdan bas tartqan soń, feldsher tańǵa deıin olardyń jaǵdaıyn baqylap, tıisti qyzmetterge aqparat berip otyrǵan. Eńbegi úshin ol vedomstvolyq nagradamen marapattalǵan.

Al joǵalǵan adamdardy izdeýde kınologtar men olardyń senimdi serikteri mańyzdy ról atqarady. Shymkent qalasy Tótenshe jaǵdaılar departamentiniń qutqarýshy-kınology Sergeı Zınovev kınologııa salasyna 30 jyldan astam ýaqytyn arnaǵan. Qazir ol kınologııalyq bólimsheni basqaryp, izdestirý ıtterin daıyndaıdy jáne jas mamandardyń kásibı sheberligin arttyrýǵa úles qosady.

Sergeıdiń senimdi serigi – nemis ovcharkasy Dınka. Ol Mıhaılov sý qoımasy mańynda 13 jastaǵy balany, sondaı-aq Saıram aýdanynyń Shapyrashty aýylynda joǵalǵan adamdy izdeýge qatysqan. Jaqynda Dınka respýblıkalyq sertıfıkattaý synaqtarynan sátti ótti. Qazaq jáne orys tilderindegi komandalardy túsinetin ıttiń daıyndyǵy kúndelikti jattyǵýlar men júıeli eńbektiń nátıjesi. Іzdestirý kezinde ıttiń daıyndyǵy men kınologtyń ony durys baǵyttaı bilýi jumystyń nátıjesine tikeleı áser etedi.

Sergeıdiń kásibı daıyndyǵy kınologııamen shektelmeıdi. Ol halyqaralyq qutqarý komandasynyń múshesi, sondaı-aq súńgýir jáne alpınıst retinde de qyzmet atqaratynyn bildik.

Qutqarý jumystarynyń taǵy bir mańyzdy kezeńi – shaqyrtýdy qabyldap, tıisti qyzmetterdi oqıǵa ornyna baǵyttaý. Bul mindetti Astana qalasynyń Josparlaý jáne jedel basqarý ortalyǵyndaǵy Órt sóndirý qyzmetimen baılanys jónindegi ortalyq baılanys pýnktiniń dıspetcheri Aıdana Іlııasova atqarady. Ol kún saıyn azamattardyń qońyraýyn qabyldap, oqıǵanyń mán-jaıyn anyqtaıdy jáne qajetti aqparatty tıisti qyzmetterge jetkizedi. Mundaı jumysta ár mınýttyń mańyzy bar. Oqıǵa týraly naqty málimet alý qutqarýshylardyń áreketin durys uıymdastyrýǵa kómektesedi.

– Biz úshin árbir qońyraý mańyzdy. Telefonnyń ar jaǵynda kómekke muqtaj adam tur. Keıde bul qońyraý onyń sońǵy qońyraýy bolýy múmkin. Sondyqtan adamdy sabyrǵa shaqyrý, oǵan kómek mindetti túrde jetetinin jetkizý qajet, – dedi Aıdana Іlııasova.

P.S. Qutqarýshylardyń jumysy – adam ómirin saqtap, qıyn sátte kómekke kelý. Olardyń kásibıligi men jaýapkershiligi tótenshe jaǵdaı kezinde talaı adamnyń aman qalýyna múmkindik berip otyr.