Qazaqstandyq qutqarýshylar Aýǵanstannan elge oraldy
Memleket basshysy Qasym-Jomart Toqaevtyń tapsyrmasymen jer silkinisiniń saldaryn joıýǵa kómek kórsetý úshin Aýǵanstanǵa barǵan Qazaqstan Tótenshe jaǵdaılar mınıstrliginiń kúshteri men quraldary elge oraldy, dep habarlaıdy Kazinform.
Gýmanıtarlyq mıssııany oryndaý úshin jalpy 45 adam, onyń ishinde TJM Respýblıkalyq jedel-qutqarý jasaǵynyń qutqarýshylary, kınologııalyq eseptoptar, Apattar medıtsınasy ortalyǵynyń dárigerleri men feldsherleri jiberilgen bolatyn.
TJM málimetine súıensek, Azamattyq qorǵanys jáne áskerı bólimderi komıteti tóraǵasynyń mindetin atqarýshy, general-maıor Ularbek Ábikeevtiń basshylyǵymen qazaqstandyq qutqarýshylar jasaǵy qoıylǵan mindetterdi abyroımen oryndady.
Jer silkinisi aımaǵynan oralǵan qutqarýshylardy áýejaıda áriptesteri, týystary men jaqyndary qarsy aldy.
Sonymen qatar «Lider.kz» qozǵalysynyń volonterleri qutqarýshylardy kezekti ret qarsy aldy. Olar Charlı, Djeıkob pen Evro atty qutqarýshy ıtterge medaldar daıyndap qoıǵan.
Gýmanıtarlyq mıssııaǵa qatysýshylardy QR TJ vıtse-mınıstri ıor Erlan Nurpeıisov quttyqtap, halyqaralyq qutqarý operatsııalary bizdiń mamandarǵa kásibı biliktiligin arttyrýǵa jáne ártúrli jaǵdaılarda jumys isteý daǵdylaryn jetildirýge kómektesetinin atap ótti.
Aýǵanstandaǵy izdestirý-qutqarý jumystaryn júrgizý barysynda Qazaqstan TJM qutqarýshylary jergilikti 83 turǵynǵa medıtsınalyq kómek kórsetip, 211 úı fragmentiniń úıindisin bólshektedi, Naıbrofı eldi mekeninde qıraǵan 700 úıdiń ýchaskesin tekserdi. Úıindi arasynan 1 balanyń denesin taýyp, alyp shyqty. Qatty shańdy daýyldan zardap shekken 9 shatyrly qalashyqtyń ornalasý oryndarynda tekserý júrgizildi. Qazaqstandyq qutqarýshylar Sııahan eldi mekeninde tolyǵymen qıraǵan úılerdiń astyn da tekserip, Cholk eldi mekeninde úıindilerdi bólshekteý jumystaryn júrgizdi.
Qutqarýshylarymyz elge oralar aldynda Aýǵan bıligi qazaqstandyqtarǵa joıqyn jer silkinisi saldaryn joıýǵa kómek kórsetkeni úshin alǵys bildirdi.
«Biz Qazaqstannyń qıyn sátte kórsetken kómegin umytpaımyz», – dedi Aýǵanstan mádenıet jáne aqparat mınıstriniń orynbasary Mohadjer Sahıb.
Eske salaıyq, 10 qazanda Qazaqstannyń 45 qutqarýshysy joıqyn jer silkinisiniń saldaryn joıýǵa kómek kórsetý úshin Aýǵanstanǵa attanǵan bolatyn. Alǵashqy táýlik ishinde 76 ýchaskedegi úıindi bólshekteldi. Keıin qutqarýshylar úıindiler astynan 5-6 jasar balanyń máıitin alyp shyqty.
Sondaı-aq 11 qazan kúni Qazaqstan halqynyń atynan gýmanıtarlyq kómektiń alǵashqy legi tıelgen arnaıy ushaq Aýǵanstannyń Gerat áýejaıyna jetti. Bul týraly oqıǵa ornynan Kazinform tilshisi Esimjan Naqtybaı habarlady.
7 qazan kúni Aýǵanstannyń batysyndaǵy Gerat provıntsııasynda 6,3 baldyq jer silkinisinen 2053 adam qaza taýyp, 9 myńnan astam adam jaraqat aldy.
Keshe, 15 qazan kúni Gerat provıntsııasynda 6,3 magnıtýdasymen taǵy da zilzala boldy.
