Qazaqstandyq kreatorlar bes aıda 200 mln teńgeniń ónimin satty

ASTANA. KAZINFORM — Qazaqstannyń 18 óńirinen jınalǵan 1000 kreator bes aıda 200 mln teńgeniń ónimin satty. Creative Aimaq respýblıkalyq jobasy aıasyndaǵy jármeńkelerge 85 myń adam kelip, saýda kólemi boıynsha Mańǵystaý oblysy kósh bastady. Bul týraly Kreatıvti ındýstrııalardy damytý qory málim etti.

Qazaqstandyq kreatorlar bes aıda 200 mln teńgeniń ónimin satty
Foto: Kreatıvti ındýstrııalardy damytý qory

Kreatıvti ındýstrııalardy damytý qory bıyl alǵash ret iske asyrylǵan Creative Aimaq respýblıkalyq jobasyn qorytyndylady. 13 maýsym men 1 qarasha aralyǵynda elimizdiń 18 óńirinen 1000 kreator qatysqan jármeńkelerge 85 myń adam kelip, jalpy saýda aınalymy 200 mln teńgege jetti.

Aqmola oblysynan bastalyp, Mańǵystaý oblysynyń shyǵarmashylyq baǵdarlamasymen aıaqtalǵan joba bes aıǵa jýyq ýaqyt boıy Qazaq Creative Hub alańynda elimizdiń ár óńirinen kelgen dızaınerlerdi, sýretshilerdi, zergerlerdi, qolónershilerdi, anımatorlar men tsıfrlyq kontent ázirleýshilerdi biriktirdi. Creative Aimaq óńirlik shyǵarmashylyq kásipkerlikti damytýǵa, kreatıvti ónimderdi kommertsııalandyrýǵa, otandyq brendterdi ilgeriletýge jáne ótkizý naryǵyn keńeıtýge baǵyttalǵan.

Saýda kólemi boıynsha úzdik bes óńir

Mańǵystaý oblysy — 33 mln 260 myń teńge

31 qazan men 1 qarasha kúnderi ótken «Mańǵystaý: Tamyr. Talǵam. Kreatıv» jármeńkesine 40 kreator qatysyp, 1800-den astam avtorlyq buıym usyndy. Eki kúnde jármeńkege 13 myń adam keldi. Mańǵystaýlyq sheberler kúmis áshekeıler, ulttyq kıimder, dástúrli jadaǵaılar, bylǵary aıaq kıimder men aksessýarlar usyndy. Mádenı baǵdarlama aıasynda «Aqshaǵyl», «Dombyra sazy», «Jorǵa» ansamblderi men Tamara Asar óner kórsetip, sán kórsetilimderi, sheberlik sabaqtary jáne Ábish Kekilbaıulynyń «Úrker» romanyna arnalǵan ádebı kezdesý uıymdastyryldy.

Aqtóbe oblysy — 23 mln 850 myń teńge

10–11 qazanda ótken jármeńkege 100 kreator qatysyp, 9500 adam keldi. Aqtóbelik kásipkerler dızaınerlik kıimder, zergerlik áshekeıler, bylǵarydan, aǵashtan, súıek pen kıizden jasalǵan buıymdar, ulttyq aksessýarlar men kádesyılar usynsa, jergilikti sýretshiler óz týyndylary men avtorlyq dızaın jobalaryn tanystyrdy.

Túrkistan oblysy — 21 mln teńge

29–30 tamyzda uıymdastyrylǵan jármeńkege 50 kreator qatysyp, 5200 adam keldi. Túrkistandyq sheberler ulttyq kilemder, zergerlik áshekeıler, dızaınerlik kıimder, dombyralar, at ábzelderi, kıizden, aǵashtan jáne qyshtan jasalǵan buıymdar, sándik pannolar, jibek oramaldar men ulttyq aksessýarlar usyndy.

Jetisý oblysy — 16 mln teńge

15–16 tamyzda ótken jármeńkege 30 kreator qatysyp, 5 myń adam keldi. Óńir sheberleri kartınalar, zergerlik áshekeıler, ulttyq oıynshyqtar, baskıimder, aǵash buıymdar men kıizden jasalǵan aıaq kıimderdi tanystyrdy. Beıneleý óneri týyndylaryna erekshe suranys baıqalyp, olardyń satylymy shamamen 10 mln teńgeni qurady. Sonymen qatar qysh jasaý óneri tanystyrylyp, sán kórsetilimderi men shyǵarmashylyq baǵdarlamalar uıymdastyryldy.

Jambyl oblysy — 15 mln 200 myń teńge

5–6 qyrkúıekte ótken «Asqaq rýhty Áýlıeata» jármeńkesine 50 kreator qatysyp, 6 myń adam keldi. Jambyldyq sheberler ulttyq kıimder, zergerlik áshekeıler, aǵashtan, bylǵary men kıizden jasalǵan buıymdar jáne avtorlyq kádesyılar usyndy. Baǵdarlama aıasynda ASPARA brendiniń dızaınerlik toptamalary, jasandy ıntellekt kómegimen ázirlengen qazaq ertegileri men anımatsııalyq týyndylar, sondaı-aq aýdany 200 sharshy metr bolatyn kıizden jasalǵan óner týyndysy kópshilik nazaryna usynyldy.

Ulttyq qolónerden tsıfrlyq tehnologııalarǵa deıin

Creative Aimaq elimizdiń mádenı murasy men kreatıvti ındýstrııalardyń zamanaýı baǵyttaryn bir alańǵa toǵystyrdy. Sán jáne dızaın salasynda otandyq dızaınerler ulttyq naqyshtaǵy kıimderdi, avtorlyq toptamalardy, aıaq kıimder men aksessýarlardy tanystyryp, dástúrli oıý-órnekterdi zamanaýı sán úlgilerimen úılestirdi. Zergerlik óner men qolóner baǵytynda kúmis áshekeıler, aǵashtan oıylǵan buıymdar, qysh ydystar, bylǵary aksessýarlar, kıizden jasalǵan turmystyq zattar men sándik-qoldanbaly óner týyndylary usynyldy.

Beıneleý óneri salasynda kartınalar, músinder, ıntererge arnalǵan avtorlyq týyndylar men sándik pannolar qoıyldy. Qaraǵandy oblysynyń kreatorlary kómirden jasalǵan óner týyndylaryn, Balqash sheberleriniń mıkromınıatıýralaryn jáne 3D basyp shyǵarý tehnologııalaryn tanystyrsa, Shymkent qalasy men Jambyl oblysynyń qatysýshylary otandyq anımatsııalyq jobalardy, jasandy ıntellekt negizindegi ázirlemeler men ınnovatsııalyq tehnologııalyq sheshimderdi kópshilik nazaryna usyndy.

Ár óńirdiń mádenı ereksheligin tanytqan baǵdarlamalar ulttyq mýzyka, teatr qoıylymdary, sán kórsetilimderi, kitap tanystyrylymdary, ádebı kezdesýler men sheberlik sabaqtaryn qamtyp, kelýshilerge elimizdiń shyǵarmashylyq jetistikterimen keńinen tanysýǵa múmkindik berdi.

Óńirlik kreatorlardyń ekonomıkalyq áleýeti

Creative Aimaq jobasy aýdan ortalyqtary men aýyldarda eńbek etetin shyǵarmashylyq kásipkerlerge óz ónimderin iri naryqqa usynýǵa, tutynýshylardyń suranysyn baǵalaýǵa, jańa klıentter tabýǵa jáne iskerlik baılanys ornatýǵa múmkindik berdi. Kreatıvti ındýstrııalardy damytý qorynyń Basqarma tóraǵasy Erlan Kanalımov jobanyń nátıjelerine toqtalyp, óńirlik shyǵarmashylyq kásipkerlikti damytýdyń basym mindetterin atap ótti.

— Creative Aimaq jobasyn bastaǵanda biz óńirlerdegi kreatorlardyń aldynda turǵan naqty máselelerdi negizge aldyq. Elimizdiń aýdan, aýyldarynda sapaly ári básekege qabiletti ónim shyǵaratyn talantty azamattar kóp. Alaıda olardyń barlyǵynda óz ónimin keń naryqqa usynýǵa, satyp alýshylar tabýǵa jáne kásibin damytýǵa múmkindik birdeı emes. Biz osy kedergilerdi azaıtyp, shyǵarmashylyq ónimniń naqty ekonomıkalyq aınalymǵa túsýine jaǵdaı jasaýdy maqsat ettik. Joba aıasynda 1000 kreatordyń 200 mln teńgeniń ónimin satýy óńirlik shyǵarmashylyq kásipkerliktiń áleýetin kórsetti. Bul tek qolónerge qatysty emes. Dızaın, sán, beıneleý óneri, anımatsııa, tsıfrlyq tehnologııalar jáne basqa da salalarda tabys tabýǵa, jańa jumys oryndaryn qurýǵa múmkindik bar. Endigi mindet — jármeńkede tanystyrylǵan ónimderdiń turaqty naryqqa shyǵýyna yqpal etý. Kreatorlar óz kásibin bir rettik is-sharaǵa táýeldi etpeı, turaqty tapsyryspen jumys isteıtin deńgeıge jetýi kerek. Biz úshin jobanyń uzaq merzimdi nátıjesi osy bolmaq, — dedi Erlan Kanalımov.

Creative Aimaq jobasynyń qorytyndysy óńirlik kreatıvti ındýstrııalardyń ekonomıkalyq áleýetin jáne otandyq avtorlyq ónimderge degen suranysty kórsetti. Qazaq Creative aldaǵy ýaqytta óńirlik kreatorlardyń turaqty tapsyrys alýyna, kásibin keńeıtýine, ótkizý naryǵyn ulǵaıtýyna jáne básekege qabiletti otandyq brendter qalyptastyrýyna qoldaý kórsetýdi jalǵastyrady.