Qazaqstandyq qos jasóspirim tennısshi Aýstralııa chempıonatynda baq synaıdy

ASTANA. KAZINFORM – Jasóspirimder arasynda 18-25 qańtar aralyǵynda ótetin Aýstralııa ashyq chempıonatynda kimderdiń baq synaıtyny belgili boldy. 

Qazaqstan tennıs federatsııasynyń baspasóz qyzmetinen málim etkenindeı, bizdiń elimizden atalmysh jarystyń negizgi bóligine jasóspirimder arasynda ITF reıtıngisinde 16-orynda turǵan Ámir Omarhanov pen 73-satydaǵy Zańǵar Nurlanuly qatysady.

Bul Zańǵar Nurlanuly úshin alǵashqy «Úlken dýlyǵa» týrnıri bolmaq. 

Al Ámir Omarhanov ótken jyly jasóspirimder arasynda Aýstralııa ashyq chempıonatynyń shırek fınalyna deıin jetip, erekshe serpilis týǵyzǵan edi.

Eske sala keteıik, budan buryn Zańǵar Nurlanulynyń bıylǵy úshinshi tıtýlyn jeńip alǵanyn jazǵan bolatynbyz.