Qazaqstandyq kórermenniń yqylasyna bólengen K-pop toby Astanaǵa keledi
ASTANA. KAZINFORM – Orda tobynyń «Kesh meni» ánin koreı tilinde oryndap, qazaqstandyqtardy tánti etken Kandis K-pop toby Comic Con Astana sahnasyna shyǵady.
Ońtústik Koreıanyń Kandis K-pop toby halyqaralyq Silk Way Star televızııalyq vokal baıqaýyna qatysqannan keıin Qazaqstanda keńinen tanyldy. Top Comic Con Astana 2026 festıvaliniń qorytyndy kúni — 9 tamyzdaóner kórsetedi. Sol kúni top músheleriniń qatysýymen qoltańba sessııasy da ótedi.
Silk Way Star baıqaýynda Kandis Koreıa Respýblıkasynyń atynan qatysyp, Orda tobynyń «Kesh meni» ánin koreı tilinde oryndaý arqyly kórermen yqylasyna bólendi. Bul kezeńde qatysýshylar qazaq ánin óz ana tilderine aýdaryp oryndaýy kerek edi. Kandis usynǵan koreı tilindegi nusqa topqa osy kezeńde jeńis ákeldi. Án az ýaqyttyń ishinde shoýdyń eń kóp talqylanǵan nómirleriniń birine aınalyp, áleýmettik jelilerde keńinen tarady. Osylaısha myńdaǵan qazaqstandyq kórermen Kandis qyzdarK-pop tobynyń shyǵarmashylyǵymen tanysty. Sonymen qatar, top baıqaýda Marhaba Sábıdiń «Dem Alam» ánin qazaq tilinde oryndady.
Kandis — Ońtústik Koreıanyń qyzdar toby. Top músheleri aıryqsha vokaldyq sheberligi men jandy daýystaǵy joǵary deńgeıli óneri arqyly ózindik mýzykalyq qoltańbasyn qalyptastyryp keledi. Olar 1990 jyldardaǵy R&B men hıp-hoptan shabyt alyp, bul janrlarǵa zamanaýı sıpat beredi. Qýatty qoıylymdary men sahnadaǵy shynaıylyǵymen kórermenge erekshe áser syılaıdy.
Comic Con Astana festıvali Qazaqstan astanasynda 2026 jylǵy 6–9 tamyz aralyǵynda ótedi. Festıvaldiń hedlaınerleri qatarynda «Taqtar talasy» telehıkaıasyndaǵy Djeıme Lannıster rólimen tanylǵan danııalyq akter Nıkolaı Koster-Valdaý, sondaı-aq Netflix-tiń «One Piece» telehıkaıasynyń juldyzdary — Mankı D. Lýffı rólin somdaǵan Inıakı Godoı men Sandjı rólin somdaǵan Taz Skaılar bar. Úsh akter de festıvaldiń basty sahnasynda kórermenmen kezdesip, qoltańba jáne fotosessııalarǵa qatysady, sondaı-aq jankúıerlerdiń suraqtaryna jaýap beredi.
Festıvalge álemge áıgili Kamui Cosplay kospleı-dýeti, sondaı-aq tanymal blogerler men kontent avtorlary SuperCrastan (Danıa Kraster), Jane Kravitz, Karrambaby, Dobryak, Dalbek, FixEye jáne Egor Shkredqatysady. Arnaıy qonaqtardyń biri — Marvel, DC, Image jáne álemniń basqa da iri baspalarymen jumys isteıtin ıtalııalyq sýretshi Paolo Pantalena. 7–9 tamyz aralyǵynda «Drýgoe ızdatelstvo» baspasy men Kryptonite Comics dúkeniniń stendinde kelýshiler sýretshimen júzdesip, qoltańba alyp, avtorlyq sketchke tapsyrys bere alady.
Comic Con Astana — Ortalyq Azııadaǵy zamanaýı pop-mádenıetke arnalǵan eń iri festıval. Ol jyl saıyn túrli elderden kıno, telehıkaıa, anıme, komıks, beıneoıyn, kospleı jáne pop-mádenıet jankúıerlerin bir alańǵa jınaıdy. Bıyl da festıval birden eki jerde — Barys Arena men «Alaý» muz saraıynda ótedi. Baǵdarlamanyń dástúrli bóligine aınalǵan halyqaralyq kospleı baıqaýynyń júlde qory 20 mıllıon teńgeni quraıdy.
Comic Con Astana bıletterin festıvaldiń resmı comicconastana.kz saıtynan jáne ıAndeks Afısha platformasynan satyp alýǵa bolady.
2026 jyly festıval seriktesteri qatarynda ıAndeks Go, ıAndeks Eda, Kınopoısk, ıAndeks Afısha, BIGBON, Chupa Chups, sondaı-aq basqa da jergilikti jáne halyqaralyq brendter bar.
Aıta keteıik, aty ańyzǵa aınalǵan akter Djekı Chan Mańǵystaý óńirine taban tiredi.
