Qazaqstandyq kompanııalar Aýǵanstanda 235 mln dollarlyq kelisimderge qol jetkizdi
ASTANA. KAZINFORM — 21-22 maýsym aralyǵynda Kabýl qalasynda Qazaqstannyń saýda-ekonomıkalyq mıssııasy ótti. Іs-shara qorytyndysy boıynsha qazaqstandyq jáne aýǵanstandyq kompanııalar jalpy somasy shamamen 235 mln AQSh dollaryn quraıtyn kelisimderge, memorandýmdarǵa jáne kommertsııalyq kelisimsharttarǵa qol qoıdy. Bul týraly Saýda jáne ıntegratsııa mınıstrligi málim etti.
Mıssııa aıasynda 50-den astam qazaqstandyq kompanııa men Aýǵanstannyń bıznes qaýymdastyǵynyń 300-den astam ókilin biriktirgen aýqymdy B2B-kezdesý uıymdastyryldy. Mıssııanyń basty oqıǵasy qazaqstandyq taýarlar men qyzmetterdiń mamandandyrylǵan kórmesi boldy. Kórme otandyq ónimderdi aýǵan naryǵyna ilgeriletý maqsatynda uıymdastyrylyp, oǵan agroónerkásiptik keshen, tamaq, toqyma, hımııa jáne farmatsevtıka salalaryndaǵy qazaqstandyq kompanııalar qatysty.
Kórme kelýshileriniń erekshe qyzyǵýshylyǵyn qazaqstandyq kondıterlik ónimder, bal, tabıǵı shyryndar, alkogolsiz sýsyndar jáne ósimdik maıy týdyrdy. Іskerlik baǵdarlamanyń mańyzdy bóligi retinde qazaqtyń ulttyq taǵamdarynyń dám tatý rásimi uıymdastyryldy. Ásirese Qyzylorda kúrishinen daıyndalǵan palaý kópshiliktiń nazaryn aýdaryp, onyń joǵary tutynýshylyq qasıetteri men eksporttyq áleýetin aıqyn kórsetti.
Forýmnyń mańyzdy nátıjeleriniń biri — aýǵandyq Nesar Elyas Trading LTD kompanııasy men «Maslozavod Týrkestan» JShS arasynda kúnbaǵys maıyn jetkizý jónindegi 10 jyldyq memorandýmnyń jasalýy boldy. Sondaı-aq «Shabyt» JShS Speranza saýda belgisimen shyǵarylatyn jarma ónimderin jetkizý boıynsha 15 mln AQSh dollaryna memorandýmǵa qol qoıdy.
Qazaqstannyń Astyq óńdeýshiler odaǵy men Aýǵanstannyń Saýda-ınvestıtsııalyq palatasy bıdaı uny men ony qaıta óńdeý ónimderiniń eksportyn damytý máseleleri boıynsha yntymaqtastyq týraly ýaǵdalastyqqa qol jetkizdi.
Konsung Technology kompanııasy, Qazaqstan-Aýǵanstan ınnovatsııalyq tehnologııalar almasý ortalyǵy (KAITEC) jáne aýǵandyq Gayur Amir Zo LTD kompanııasy arasynda Aýǵanstan naryǵynda zamanaýı medıtsınalyq tehnologııalardy ilgeriletýge baǵyttalǵan yntymaqtastyq týraly kelisimderge qol qoıyldy. Aýǵan tarapynyń erekshe qyzyǵýshylyǵyn Konsung Technology ázirlegen HES-7 portatıvti densaýlyq dıagnostıkasy júıesi týdyrdy. Bul júıe patsıenttiń turǵylyqty jerinde fýnktsıonaldyq jáne zerthanalyq dıagnostıka júrgizýge múmkindik beredi. Aýǵanstannyń kóptegen eldi mekenderiniń shalǵaı ornalasýyn jáne birqatar óńirlerde medıtsınalyq ınfraqurylymǵa qoljetimdiliktiń shekteýli ekenin eskere otyryp, mundaı sheshimder halyqqa sapaly medıtsınalyq qyzmet kórsetýdi keńeıtýdiń tıimdi quraly retinde qarastyrylyp otyr.
Іskerlik baǵdarlamanyń taǵy bir nátıjesi — «Astana» halyqaralyq qarjy ortalyǵynda tirkelgen qazaqstandyq Samsar Holding kompanııasy men aýǵandyq Amo Tracks Trading and Logistics Company arasynda yntymaqtastyq týraly memorandýmǵa qol qoıylýy boldy. Taraptar koks óndirý jáne elektr energııasyn generatsııalaý boıynsha kómir jylý elektr stantsııasyn birlesip salý jobasyn iske asyrý jóninde aldyn ala kelisimderge qol jetkizdi. Joba quny 20-30 mln AQSh dollaryna baǵalanýda. Qazirgi ýaqytta taraptar shıkizat bazasynyń sıpattamalary men bolashaq óndiristik keshenniń parametrlerin zerdeleýdi qosa alǵanda, jobanyń tehnıkalyq máselelerin pysyqtaýda.
Saýda-ekonomıkalyq mıssııanyń qorytyndylary aýǵan naryǵynyń qazaqstandyq ónimge degen qyzyǵýshylyǵynyń artyp kele jatqanyn jáne ekijaqty saýda-ekonomıkalyq yntymaqtastyqty odan ári keńeıtýdiń joǵary áleýetin kórsetti. Qol qoıylǵan qujattar ózara saýda kólemin ulǵaıtýǵa, iskerlik baılanystardy nyǵaıtýǵa jáne ekonomıkanyń perspektıvaly salalarynda jańa birlesken jobalardy iske asyrýǵa negiz qalaıdy.
Buǵan deıin Qazaqstan-Aýǵanstan bilim berý jáne ǵylymı-zertteý ortalyǵy qurylatynyn jazdyq.
