Qazaqstandyq komandalar dron-fýtboldan halyqaralyq týrnırdiń úzdik ondyǵyna endi
ASTANA. KAZINFORM — Qazaqstandyq komandalar 15-17 shilde aralyǵynda Koreıa Respýblıkasynda ótken FIDA Intercontinental Cup 2026 halyqaralyq týrnırinde joǵary nátıje kórsetti. Jarysqa álemniń 20-dan astam elinen 60-tan astam komanda qatysty.
Qazaqstan atynan týrnırge alty komanda qatysty: Class 20 jáne Class 40 sanattaryndaǵy ulttyq quramalar, sondaı-aq Class 20 sanatyndaǵy tórt klýbtyq komanda.
Jarys qorytyndysy boıynsha Qazaqstannyń Class 40 sanatyndaǵy ulttyq quramasy 6-orynǵa, al Class 20 sanatyndaǵy ulttyq quramasy 7-orynǵa ıe boldy. Sonymen qatar Class 20 sanatyndaǵy qazaqstandyq klýbtyq komandalardyń biri 60-tan astam komanda arasyndaǵy jalpy reıtıngte úzdik ondyqqa endi.
Joǵary deńgeıdegi óneri, sporttyq sheberligi jáne halyqaralyq yntymaqtastyqty damytýǵa qosqan úlesi úshin qazaqstandyq barlyq komandalar International Excellence Award halyqaralyq syılyǵymen marapattaldy.
Dron-fýtbol sońǵy birneshe jylda Qazaqstanda qarqyndy damyp keledi. Búginde qazaqstandyq komandalar halyqaralyq jarystarda joǵary nátıje kórsetip, elimizde joǵary tehnologııalyq sport túrin damytý, sportshylardy daıarlaý jáne jastardyń ınjenerlik ári tsıfrlyq tehnologııalarǵa qyzyǵýshylyǵyn arttyrý baǵytyndaǵy júıeli jumystyń nátıjesin kórsetýde.
FIDA Intercontinental Cup 2026 týrnıriniń nátıjeleri qazaqstandyq komandalardyń daıyndyq deńgeıiniń joǵary ekenin jáne elimizde dron-fýtboldyń turaqty damyp kele jatqanyn kórsetti. Ulttyq quramalar men klýbtyq komandalardyń halyqaralyq jarystaǵy joǵary nátıjeleri Qazaqstannyń tehnologııalyq sport túrleri boıynsha halyqaralyq deńgeıdegi áleýetiniń artyp kele jatqanyn aıǵaqtaıdy.
Aıta ketelik Qazaqstan quramasy alǵash ret fızıka olımpıadasynda bes altyn jeńip alǵan edi.
