Qazaqstandyq komanda FIDE-niń ýnıversıtetter arasyndaǵy álem chempıonatynda qola júlde aldy
ASTANA. KAZINFORM - Almatyda tarıhta alǵash ret ýnıversıtetter arasynda FIDE komandalyq álem chempıonaty ótti.
QR Ǵylym jáne joǵary bilim mınıstrligi baspasóz qyzmetiniń habarlaýynsha, jarys qorytyndysy boıynsha Ural State Mining University (Reseı) komandasy chempıon atansa, Saint Louis University (AQSh) kúmis júldeni ıelendi. Úshinshi orynǵa Qazaq ulttyq sport ýnıversıtetiniń (KNUS) komandasy jaıǵasty.
Chempıonattyń saltanatty is-sharalary men fınaldyq oıyndary ál-Farabı atyndaǵy Qazaq ulttyq ýnıversıtetiniń Farabi Hub alańynda ótti. Jarys uıymdastyrýshylarynyń qatarynda Halyqaralyq shahmat federatsııasy (FIDE) men QR Ǵylym jáne joǵary bilim mınıstrligi bar.
FIDE-niń ýnıversıtetter arasyndaǵy alǵashqy komandalyq álem chempıonatynyń fınaldyq kezeńine joldama alý úshin 49 elden 79 komanda baq synady. Onlaın irikteý qorytyndysy boıynsha eń myqty segiz komanda fınaldyq kezeńge joldama alsa, taǵy segiz komanda uıymdastyrýshylardyń shaqyrýymen qatysty.
Osylaısha, Almatyda álemniń túkpir-túkpirinen kelgen 16 ýnıversıtettik komanda bas qosty.
Qazaq ulttyq sport ýnıversıteti komandasynyń óner kórsetýi erekshe atap ótýge laıyq. KNUS komandasy týrnır tarıhynda alǵash ret álem chempıonatynyń júldegerleri qatarynan kórindi.
Shırek fınalda KNUS komandasy Afına ulttyq tehnıkalyq ýnıversıtetiniń komandasymen kezdesti. Eki matchtyń qorytyndysy boıynsha qazaqstandyq komanda 5:3 esebimen jeńiske jetip, chempıonattyń jartylaı fınalyna joldama aldy.
Úshinshi oryn úshin tartysta KNUS komandasynyń qarsylasy AQSh-tyń University of Texas at Dallas komandasy boldy. Eki matchtyń qorytyndysy boıynsha Qazaq ulttyq sport ýnıversıtetiniń komandasy FIDE-niń ýnıversıtetter arasyndaǵy alǵashqy komandalyq álem chempıonatynyń qola júldesin ıelendi.
KNUS quramynda jas qazaqstandyq grossmeıster, 20 jasqa deıingi jasóspirimder arasyndaǵy álem chempıony, Qazaq ulttyq sport ýnıversıtetiniń stýdenti Qazybek Nógerbek óner kórsetti. 2024 jyly ol óz jas sanatynda jasóspirimder arasyndaǵy álem chempıonatynda jeńimpaz atandy. Bul jolǵy týrnırde Qazybek Nógerbek komandanyń tabysty óner kórsetýine óz úlesin qosyp, onyń jartylaı fınalǵa shyǵýyna yqpal etti.
Shahmatty qosa alǵanda zııatkerlik sport túrlerin damytý – daryndy jastardy qoldaý jumysynyń mańyzdy baǵyttarynyń biri. Shahmat strategııalyq oılaý, zeıin qoıý, tártip pen baıypty sheshim qabyldaý qabiletterin damytýǵa yqpal etedi. Qazaqstandyq stýdentterdiń halyqaralyq arenadaǵy jetistikteri otandyq jastardyń joǵary áleýetin kórsetedi.
- Almatyda ýnıversıtetter arasyndaǵy FIDE komandalyq álem chempıonatynyń alǵash ret ótkizilýi ýnıversıtettik sportty jáne halyqaralyq yntymaqtastyqty damytýdaǵy mańyzdy qadam boldy. Týrnır álemniń ártúrli elderindegi jetekshi ýnıversıtetterdiń ókilderin biriktirip, sporttyq jáne akademııalyq baılanystardy nyǵaıtýǵa jańa múmkindikter ashty, -delingen habarlamada.
QR Ǵylym jáne joǵary bilim mınıstrligi Qazaq ulttyq sport ýnıversıtetiniń komandasyn álem chempıonatynda qola júlde ıegeri atanýymen quttyqtap, sportshylarǵa halyqaralyq arenada jańa jeńister tileıdi.
Osyǵan deıin Almatyda ýnıversıtetter arasyndaǵy tuńǵysh FIDE álem chempıonaty ótetini týraly jazdyq.
