Qazaqstandyq komanda bedeldi halyqaralyq avtojarysta ekinshi oryn aldy
ASTANA. KAZINFORM — Italııanyń Rıchchone qalasynda ótip jatqan Lamborghini Super Trofeo Europe serııasy altynshy kezeńiniń alǵashqy jarys kúni óz máresine jetti.
Mısano halyqaralyq avtodromynda alańǵa shyqqan qazaqstandyq Artline Kazakhstan avtosport komandasy shabandozdary Shota Abhazava men Egor Orýdjev Pro-Am sanatynda úzdik nátıje kórsetip, 50 mınýtqa sozylǵan básekede ekinshi oryn ıelendi.
Qazaqstandyq komanda jarystyń 35 mınýtynda kósh bastaýǵa múmkindigi bolǵan edi. Alaıda burylysta Orýdjev basqarǵan mashına qarsylaspen soqtyǵysyp, joldan shyǵyp qala jazdady.
Osylaısha, qazaqstandyq komanda ýaqyt joǵaltyp aldy. Alaıda, otandastarymyz eń sońǵy sátke deıin baryn salyp, máre syzyǵyn ekinshi bolyp kesti.
Lamborghini Super Trofeo — Lamborghini Squadra Corse uıymdastyrǵan halyqaralyq avtojarys serııasy. Eýropa, Azııa jáne Soltústik Amerıka qurlyǵyndaǵy týrnırde shabandozdar 6 kezeńde 2 jarys alańynda (50 mınýt) synǵa túsip, fınaldyq kezeńdi ózara sarapqa salady.
Sonymen qatar bul avtojarysta Huracán Super Trofeo Evo modeldik kólikteri qoldanylady.
Osyǵan deıin habarlaǵanymyzdaı, Artline Kazakhstan avtosport komandasy Lamborghini Super Trofeo serııasynyń Eýropalyq jáne álemdik fınalynda óner kórsetedi.
