Qazaqstandyq kolledj stýdentteri TMD-daǵy kıberqaýipsizdik týrnırinde top jardy

ASTANA. KAZINFORM – Elordadaǵy Joǵary polıtehnıkalyq kolledj stýdentteri kıberqaýipsizdik boıynsha GO CTF TATARSTAN 2025 II halyqaralyq týrnırinde birinshi oryndy ıelendi.

Fınalǵa TMD elderiniń eń myqty 20 komandasy qatysqan.

GO CTF – XXI ǵasyrdyń eń suranysqa ıe mamandyqtarynyń biri sanalatyn kıberqaýipsizdik salasynda tsıfrlyq quzyretterdi damytýǵa, komandalyq jumysty jetildirýge jáne jańa mamandardy daıarlaýǵa baǵyttalǵan halyqaralyq chempıonat.

Astana Polytechnic stýdentteriniń bul jeńisi «Jumysshy mamandyqtar jyly» aıasynda qoldanbaly mamandyqtardyń suranysqa ıe ári bedeldi ekenin aıqyndap, qazaqstandyq jas mamandardyń kıberqaýipsizdik sııaqty aldyńǵy qatarly baǵyttarda halyqaralyq deńgeıde básekege qabiletti ekenin kórsetti.

– Bizdiń stýdentter jumysshy mamandyqtar qazir tek dástúrli salalar ǵana emes, sonymen qatar bilimdi, kreatıvtilikti jáne komandalyq eńbekti talap etetin joǵary tehnologııalyq baǵyttar ekenin dáleldedi. GO CTF týrnırindegi jeńis – eldiń tsıfrlyq qaýipsizdigin qamtamasyz etetin jańa býyn mamandaryn qalyptastyrýǵa qosqan úles, – dedi QR Oqý-aǵartý mınıstrliginiń Tehnıkalyq jáne kásiptik bilim departamentiniń dırektory Áset Muhanbetov.

Aıta keteıik, qazaqstandyq oqýshylar halyqaralyq bilim báıgelerinde 1000-nan astam medal jeńip aldy.