Qazaqstandyq muǵalim halyqaralyq INSPIRATION AWARD syılyǵynyń ıegeri atandy
ASTANA. KAZINFORM – Pavlodar oblysyndaǵy B.Ahmetov atyndaǵy joǵary pedagogıkalyq kolledjdiń arnaıy pánder oqytýshysy Gúlmıra Meshitbaeva halyqaralyq ETF New Learning Award 2026 kásibı baıqaýynda bedeldi INSPIRATION AWARD syılyǵyn jeńip aldy. Bul týraly Oqý-aǵartý mınıstrligi habarlady.
ETF New Learning Award – bilim berý salasyndaǵy ozyq tájirıbelerdi anyqtaýǵa jáne taratýǵa baǵyttalǵan halyqaralyq bastama. Baıqaý álemniń ártúrli elderinen kelgen pedagogterdiń tájirıbe almasýyna múmkindik beredi.
Gúlmıra Meshitbaeva baıqaýǵa «Bastaýysh bilim berý» mamandyǵy stýdentterin daıarlaýda qoldanylatyn SCAFFOLD kartalary boıynsha tájirıbesin usyndy. Bul ádisteme stýdentterdiń tsıfrlyq tehnologııalardy tıimdi paıdalanýyna jol ashty. Nátıjesinde olar beınematerıaldar men túrli deńgeıdegi tapsyrmalardy qamtıtyn bilim berý jobalary men saıttaryn ázirledi.
Jobalar bastaýysh synyp oqýshylaryn oqytýda zamanaýı tásilderdi qoldanýǵa kómektesedi. Sondaı-aq pedagogterge ádistemelik qoldaý kórsetip, ata-analarǵa praktıkalyq usynymdar usynady.
Aıta ketý kerek, SCAFFOLD tehnologııasy Qazaqstanda DARYA SCAFFOLD pılottyq jobasy aıasynda engizilgen. B.Ahmetov atyndaǵy joǵary pedagogıkalyq kolledj bul jobaǵa 2024 jyldyń qyrkúıeginen bastap qatysyp keledi.
Kolledj stýdentteri atalǵan ádistemeni oqý barysynda meńgerip, pedagogıkalyq praktıka kezinde mektepterde qoldanyp jatyr.
Halyqaralyq sarapshylar qazaqstandyq pedagogtiń tájirıbesin joǵary baǵalady. Nátıjesinde jumys «Scaffold quraldaryn paıdalaný arqyly muǵalimderdiń múmkindikterin keńeıtý» nomınatsııasynda INSPIRATION AWARD syılyǵyna laıyq dep tanyldy.
Gúlmıra Meshitbaevaǵa óz tájirıbesin Belgııanyń Brıýssel qalasynda ótetin halyqaralyq konferentsııada tanystyrý múmkindigi berildi.
Aıta keteıik, Senat muǵalimdi artyq júktemeden bosatatyn zańdy maquldady.
