Qazaqstandyq klýbtardyń Konferentsııa lıgasyndaǵy yqtımal qarsylastary anyqtaldy

ASTANA. KAZINFORM - Qazaqstandyq klýbtardyń fýtboldan Konferentsııa lıgasyndaǵy yqtımal qarsylastary belgili boldy. 

«Astana» fýtbol klýbynyń Konferentsııa lıgasyndaǵy joryǵyn birden ekinshi irikteý kezeńinen bastap, Moldovanyń «Zımbrý» komandasymen sheberlik baıqasady.
Komandalar 24 jáne 31 shilde kúnderi úshinshi irikteý kezeńiniń joldamasyn sarapqa salady.

«Ordabasy» Konferentsııa lıgasy ekinshi irikteý kezeńine shyqqan jaǵdaıda dál sol kúnderi Kıprdiń «Omonııa» klýbymen oınaıdy. Olarǵa alǵashqy irikteý kezeńinde Grýzııanyń «Torpedo» (Kýtaısı) komandasy qarsylas atanǵan bolatyn. Oıyndar 10 jáne 17 shildege josparlanǵan.

Almatylyq «Qaırat» Konferentsııa lıgasyna túsken jaǵdaıda ekinshi irikteý kezeńinde FKSB (Rýmynııa) ben «Inter d’Eskaldes» (Andorra) jubynyń jeńimpazymen oınaıdy. Qazirge deıin«Qaırattyń» Chempıondar lıgasynyń birinshi jáne ekinshi irikteý kezeńindegi qarsylastary belgili bolyp otyr. Olar aldymen Slovenııanyń «Olımpııa» komandasymen kim myqtyny anyqtasa, kelesi kezeńge shyqqan jaǵdaıda KýPS (Fınlıandııa) men «Mılsamı» (Moldova) jubynyń jeńimpazymen kezdesedi.

Al «Aqtóbe» Konferentsııa lıgasyna túsken jaǵdaıda Chehııanyń «Sparta» klýbymen oınaıdy. Oǵan deıin qazaqstandyq klýb Eýropa lıgasy birinshi irikteý kezeńinde Polshanyń «Legııa» (Varshava) klýbymen kim myqtyny anyqtaıdy. Oıyndar 10 jáne 17 shildege josparlanǵan. Bul jupta jeńimpaz bolǵan klýb ekinshi irikteý kezeńinde Chehııanyń «Banık» klýbymen sheberlik baıqasady. Birinshi oıyn 24 shildege, jaýapty kezdesý 31 shildege josparlanǵan.