Qazaqstandyq qymyz halyqaralyq marapatqa ıe boldy
ASTANA. KAZINFORM — Qazaqstandyq dástúrli qymyzdy zamanaýı qaptamada usyný jobasy halyqaralyq Pentawards baıqaýynda qola júldege ıe boldy. Bul týraly brend-strateg Yrysty Erden Jibek Joly telearnasyndaǵy «Búgin.live» baǵdarlamasynda aıtty.
Mamannyń aıtýynsha, halyqaralyq deńgeıde moıyndalý komanda úshin mańyzdy jetistik boldy. Ásirese baıqaýdyń aýqymyn eskersek, bul marapattyń mańyzy zor. Pentawards syılyǵynyń 20-shy mereıtoılyq baıqaýyna 66 eldiń ókilderi qatysyp, eki myńǵa jýyq ótinim túsken. Olardyń 20 paıyzynan azy ǵana marapatqa ıe bolǵan.
— Bul biz úshin óte mańyzdy marapat. Ony brendıng álemindegi «Oskarmen» salystyrýǵa bolady. Buǵan deıin kóktemde Nıý-Iorkte ótetin, ózindik «Altyn globýs» sanalatyn Dieline syılyǵyn alǵan edik. Qymyz sııaqty ónimmen qatarynan eki marapatqa ıe bolý biz úshin úlken jetistik, — dedi Yrysty Erden.
Onyń aıtýynsha, joba bastapqyda halyqaralyq baıqaýlarǵa qatysý maqsatynda qolǵa alynbaǵan. Komanda jergilikti óndirýshimen birlesip, dástúrli sýsynnyń jańa brendin qalyptastyrýǵa basymdyq bergen.
— Men jergilikti óndirýshilerdi árdaıym qoldaımyn. Shynaıy ónimderdi, isine jan-tánimen berilgen kásipkerlerdi jaqsy kóremin. Biz tek óz jumysymyzdy sapaly oryndaýǵa tyrystyq. Keıin ǵana jobany baıqaýǵa usynýdy uıǵardyq, — dedi brend-strateg.
Onyń sózinshe, joba ońaı bolmaǵan. Sebebi qymyz — dástúrli sýsyn, ony zamanaýı ári alyp júrýge yńǵaıly qaptamada usyný tájirıbesi sırek kezdesedi. Jumys barysynda komanda birneshe tujyrymdama ázirlegen. Al marapatqa ıe bolǵan úlgi tapsyrys berýshi úshin keıin júzege asyrylǵan nusqadan ózgeshe bolǵan.
Yrysty Erdenniń aıtýynsha, basty maqsat aýdıtorııaǵa belgili bir beıneni kúshtep tańý emes, qazaqstandyqtarǵa jaqsy tanys sýsynǵa jańasha kózqaras qalyptastyrý bolǵan.
— Men adamdardy osy taqyrypta oı bólisýge shaqyrǵym keldi. Súıikti sýsynymyzǵa basqasha qaraıyq dedik. Onyń alyp júrýge yńǵaıly bolǵanyn, ózimizben birge alyp júre alatynymyzdy qaladyq. Qymyzdy qaıtadan kúndelikti ómirimizge engizeıik degen oı boldy, — dep túsindirdi ol.
Joba boıynsha jumys bir jylǵa jýyq ýaqytqa sozylǵan. Tujyrymdamany ázirleýge birneshe aı jumsalyp, odan keıin komanda tapsyrys berýshimen birlesken jumysty jalǵastyryp, brendti damytýǵa qoldaý kórsetken.
Brend-strateg óz jumysy ónimniń syrtqy beınesin jasaýmen ǵana shektelmeıtinin de atap ótti. Ol naryqty, tutynýshylardy jáne ónimniń erekshelikterin zerttep, brendtiń baǵyty men negizgi ıdeıasyn aıqyndaıdy. Al dızaınerler men basqa mamandar osy strategııany naqty iske asyrady.
Buǵan deıin qazaqstandyq qymyz dızaıny Nıý-Iorkte úzdik dep tanylǵany týraly jazǵan edik.
