Qazaqstandyq kıbersportshylar tarıhı jetistikke jetti
ASTANA. KAZINFORM – Kıbersport álemde eń qarqyndy damyp kele jatqan sport baǵyttarynyń biri. Qazaqstan da bul salada tarıhı nátıjege qol jetkizip otyr.
eFootball Mobile-dan ulttyq qurama Eýropanyń úzdik segiz komandasynyń qataryna enip, endi Portýgalııada ótetin qurlyq chempıonatynda el namysyn qorǵaıdy.
Bul týraly ulttyq qurama oıynshysy Janserik Meırambek pen bas bapker Nurdáýlet Hamıtov Jibek Joly telearnasynyń «Búgin.LIVE» baǵdarlamasynda aıtty.
Týrnırdi sátti bastaǵan Janserik Meırambektyń aıtýynsha, Eýropanyń úzdik quramalarymen bir deńgeıde óner kórsetý – úlken tájirıbe ári jaýapkershilik.
– Sózben aıtyp jetkizý qıyn. Alǵashynda qobaljydyq, tipti senbedik. Sebebi Ýkraına men Túrkııa sııaqty myqty quramalarmen bir topqa tústik. Soǵan qaramastan elimizdiń namysyn abyroımen qorǵaýǵa bar kúshimizdi saldyq, - dedi ol.
Onyń sózinshe, týrnırdegi eń myqty qarsylastardyń biri – Grýzııa quramasy.
– Týrnırdegi eń myqty quramalardyń biri – Grýzııa komandasy. Olar bul baǵytta 2-3 jyldan beri turaqty oınap keledi. Jartylaı fınalda solarmen kezdesip, 3:1 esebimen ese jiberdik. Daıyndyqtary óte joǵary ekeni birden baıqaldy. Biraq biz de tájirıbe jınap kelemiz. Aldaǵy ýaqytta olarmen teń dárejede oınaıtyn deńgeıge jetemiz dep senemin , – dedi sportshy.
Ulttyq qurama sapyna oıynshylar birden qabyldanbaǵan. Aldymen elimizdiń ár óńirinen jınalǵan úzdik komandalar arasynda irikteý týrnıri ótken. Oǵan 20 komanda qatysyp, Janserik pen Nursultan jeńimpaz atanǵan.
– Іrikteý kezeńi týraly áleýmettik jeliden bildik. Jalpy 20 komanda qatysty. Alǵashqy oıyndarda sátsizdikke ushyrap, ulttyq qurama sapyna óte almaımyz ba degen oı boldy. Biraq jigerimizdi jınap, qaıta kúsh saldyq. Nátıjesinde barlyq qarsylasty jeńip, joldama aldyq. Qazaqstandaǵy komandalardyń deńgeıi óte joǵary – dedi ol.
Іrikteýden keıin ulttyq qurama Eýropa chempıonatyna daıyndyqty bastaǵan. Oıynshylar kúnine 5-6 saǵattan telefon arqyly jattyǵyp, taktıkalaryn jetildirip júr.
– Jarysqa bir-eki apta qalǵanda jaqsy ınterneti bar jerde jınalyp, birlesip daıyndaldyq. Taktıkalardy pysyqtap, standartty jaǵdaılardy, aıyp soqqylaryn jáne oıynnyń basqa da elementterin qaıtalaımyz. Jáı kúnderi 2-3 saǵat jattyqsaq, týrnır qarsańynda daıyndyq 5-6 saǵatqa deıin jalǵasady. Bul oıynda psıhologııalyq daıyndyqtyń mańyzy óte zor. Sebebi jarys kezinde tolqý kóp bolady – dedi Janserik Meırambek.
Ol kıbersportpen 2021 jyldan beri aınalysady eken. Onyń pikirinshe, Qazaqstanda bul salaǵa qyzyǵatyn jastar kóp. Alaıda jetistikke jetýdiń basty sharty – tártip.
– Kıbersport – sporttyń bir túri. Munda da eń bastysy – tártip. Ýaqytyly uıyqtap, kún tártibin saqtaý qajet. Buryn ata-anam kıbersportqa kúmánmen qaraıtyn. Biraq sońǵy jetistikterimizden keıin bul salanyń da úlken sport ekenin túsindi. Men ótken jyly jeke oıynshylar arasyndaǵy jarystarǵa qatysyp, keıin ulttyq qurama sapyna shaqyrtý aldym. Biz Mobile Football, ıaǵnı telefon arqyly oınalatyn fýtbolda baq synaımyz , – dedi ol.
Baǵdarlama barysynda ulttyq quramanyń bas bapkeri Nurdáýlet Hamıtov ta komandanyń áleýetine joǵary baǵa berdi.
– Jigitterdiń oıyny kóńilimnen shyqty. Olar budan da joǵary nátıjege jete alady. Tipti Grýzııa sekildi myqty quramalardy da jeńýge áleýeti jetedi. Ol úshin fızıkalyq jáne psıhologııalyq daıyndyqty qatar kúsheıtý qajet. Birneshe oqý-jattyǵý jıynynan keıin budan da bıik belesterdi baǵyndyramyz dep senemin , – dedi bas bapker.
Kıbersporttan ulttyq quramanyń kelesi mańyzdy oıyny – Portýgalııada ótetin Eýropa chempıonaty. Eger komanda bul jarysta sátti óner kórsetse, álem chempıonatyna joldama alady. Qazir ulttyq qurama qurlyq dodasyna daıyndyqty jalǵastyryp jatyr.
Aıta keteıik, Qazaqstandyq kıbersportshy Danıl Golýbenko HLTV.org portalynyń tańdaýy boıynsha 2025 jyldyń úzdik debıýtanty atandy.
