Qazaqstandyq kıbersportshy HLTV nusqasy boıynsha álemniń úzdik debıýtanty atandy
ASTANA. KAZINFORM – Qazaqstandyq kıbersportshy Danıl Golýbenko HLTV.org portalynyń tańdaýy boıynsha CS2 dıstsıplınasy boıynsha 2025 jyldyń úzdik debıýtanty atandy.
Bul nátıjeler HLTV Awards 2025 saltanatty rásiminde jarııalandy. Onda Counter-Strike oıyny boıynsha áleminiń úzdik oıynshylary men komandalary marapattaldy.
FURIA Esports komandasynyń qazaqstandyq oıynshysy bul ataqqa úmitkerler arasynda basty qarsylastary reseılik Maksım kyousuke Lýkın (Team Falcons) men Kosovodan shyqqan Drın makazze Shakırden (Natus Vincere) basym tústi.
Marapatty qazaq sportshysyna Counter-Strike tarıhyndaǵy belgili oıynshylardyń biri, marokkalyq-belgııalyq Adıl ScreaM Benrlıto tabys etti. Al «Jyl oıynshysy» ataǵy úshinshi ret frantsýz Mate ZywOo Erboda qaldy. Sonymen qatar Danıl Golýbenko maýsym qorytyndysy boıynsha HLTV-diń jalpy reıtınginde 6-orynǵa kóterildi.
20 jastaǵy Danıl Golýbenko – Semeı qalasynyń týmasy. Ol bul sport túri boıynsha birqatar belesti baǵyndyryp úlgerdi. Atap aıtqanda, FURIA Esports komandasyna 2025 jyldyń kókteminde qosylǵannan keıin, jazda Astanada ótken iri PGL týrnıriniń jartylaı fınalyna shyqty. Maýsymnyń mańyzdy oqıǵasy – 21 qyrkúıekte FURIA komandasynyń FISSURA Playgrounds 2 týrnırinde 1,2 mıllıon dollar júlde qorymen jeńiske jetýi boldy. Osy týrnırde Danıl Golýbenko MVP ataǵyn ıelenip, óziniń joǵary deńgeıdegi oıyn sheberligin kórsetti.
Eske sala keteıik, buǵan deıin qazaqstandyq kıbersportshy kezekti márte halyqarylyq týrnırde top jarǵanyn jazǵanbyz.