Qazaqstandyq kásiporyndardyń 75,6 mln teńge shyǵyny óteldi
ASTANA. KAZINFORM — Otandyq kásiporyndarǵa shyǵynnyń 50%-na deıin ótemaqy beriledi, dep habarlaıdy Ónerkásip jáne qurylys mınıstrliginiń baspasóz qyzmeti.
Vedomstvo atap ótkendeı, memleket otandyq kásiporyndardy qoldaý jumystaryn júıeli túrde jalǵastyryp keledi. Qoldanystaǵy memlekettik yntalandyrý sharalary óndiris kólemin ulǵaıtýǵa, kásiporyndardyń básekege qabilettiligin arttyrýǵa jáne qazaqstandyq ónimniń naryqtaǵy pozıtsııasyn nyǵaıtýǵa baǵyttalǵan.
Jyl basynan beri memlekettik qoldaý sharalary aıasynda óńdeý ónerkásibi kásiporyndarynyń shamamen 75,6 mln teńge kólemindegi shyǵyndary óteldi. Bul týraly «QazIndustry» qazaqstandyq ındýstrııa jáne eksport ortalyǵy» AQ Memlekettik yntalandyrý sharalary dırektsııasy habarlady.
— Qarajattyń basym bóligi — 74 mln teńgeden astamy — eńbek ónimdiligin arttyrýǵa baǵyttalǵan shyǵyndardy óteýge jumsaldy. Ótemaqy Astana, Almaty, Shymkent qalalarynyń, sondaı-aq Aqmola jáne Soltústik Qazaqstan oblystarynyń mashına jasaý, jeńil ónerkásip jáne qurylys materıaldaryn óndirý salalaryndaǵy kásiporyndaryna berildi, — dep habarlady dırektsııa ókilderi.
Sonymen qatar QazIndustry otandyq taýarlardy ishki naryqqa ilgeriletýge baılanysty shyǵyndardy óteıdi. Olardyń qataryna halyqaralyq sertıfıkattaýdan ótý, óndiriletin ónimdi sertıfıkattaý jáne zerthanalyq synaqtan ótkizý, sertıfıkattardy tirkeý, sáıkestendirý quraldaryn engizýge arnalǵan jabdyqtardy, onyń ishinde aıaq kıim ónimderin tańbalaýǵa arnalǵan baǵdarlamalyq qamtamasyz etýdi satyp alý jáne ózge de shyǵyndar kiredi. Osy baǵyt aıasynda Pavlodar oblysyndaǵy kásiporynnyń 1,4 mln teńgeden astam somaǵa shyǵyny óteldi.
Aıta keteıik, QazIndustry ónerkásipti memlekettik yntalandyrý sharalaryn usyný boıynsha ulttyq operator retinde joǵaryda atalǵan shyǵyndardyń 40%-dan 50%-ǵa deıingi bóligin óteıdi. 2025 jyldyń qorytyndysy boıynsha maquldanǵan ótinimderdiń jalpy somasy 1,4 mlrd teńgeden asty. Nátıjesinde 60 kásiporynǵa memlekettik qoldaý kórsetildi.
Ótken jyly Ónerkásip jáne qurylys mınıstrligi óńdeý sektoryn qoldaýdy kúsheıtý maqsatynda ónerkásipti memlekettik yntalandyrý quraldaryn jańartty.
Atap aıtqanda, endi otandyq kásiporyndar basym taýarlardy el ishinde temirjol kóligimen tasymaldaýǵa jumsaǵan shyǵyndarynyń 50%-yn óteı alady. Ótemaqynyń eń joǵary mólsheri 10 myń AEK nemese 43,25 mln teńgeni quraıdy.
Budan bólek, halyqaralyq sertıfıkattaýǵa jumsalatyn shyǵyndardy óteý kólemi bes esege — 3000 AEK-ten 15 000 AEK-ke deıin ulǵaıtyldy. Mundaı sertıfıkattaý qazaqstandyq taýar óndirýshilerdiń transulttyq kompanııalardyń satyp alýlaryna qatysýǵa múmkindik beredi.
Memlekettik yntalandyrý sharalary týraly tolyq aqparat myna siltemedegi «Bıznesti yntalandyrý» bóliminde ornalastyrylǵan. Sonymen qatar ár seısenbi jáne beısenbi kúnderi QazIndustry keńsesinde (Astana qalasy, Qabanbaı batyr dańǵyly, 17, E blogy) Ashyq esik kúnderi ótkiziledi. Keńes alý úshin +7 (7172) 79 33 99 (ishki 444) baılanys telefony arqyly habarlasýǵa bolady.
Buǵan deıin Úkimette ónerkásip, energetıka jáne kólik salalaryn damytý máseleleri qaralǵanyn jazǵanbyz.
