Qazaqstandyq kásiporyndar 4 aıda 9 trln teńgeniń taýaryn óńdep shyǵarǵan

ASTANA. KAZINFORM — Ónerkásip jáne qurylys mınıstri Ersaıyn Naǵaspaev Úkimet otyrysynda qazaqstandyq kásiporyndar 4 aıda 9 trln teńgeniń taýaryn óńdep shyǵarǵanyn málim etti.

— Tórt aıdyń qorytyndysy boıynsha óńdeý ónerkásibi 7,2%-ǵa ósip, 9 trln teńge kóleminde ónim shyǵaryldy. Eń joǵary ósim mashına jasaý (111,2%), hımııa ónerkásibi (111,2%), qurylys ındýstrııasy (112,9%) jáne jıhaz óndirisi (114,8%) salalarynda baıqalady, — dedi mınıstr.

Ersaıyn Naǵaspaev óńdeý ónerkásibin qoldaý úshin retteletin satyp alý tetigi engizilgenin málim etti.

— Osy quraldyń arqasynda otandyq taýarlardyń 4800-den astam pozıtsııasyna basymdyq berildi. Osy jylǵy bes aıdyń qorytyndysy boıynsha memlekettik organdar otandyq taýar óndirýshilermen 303 mlrd teńge bolatyn 96 myńnan astam kelisimshartqa otyrdy. Bul ótken jylmen salystyrǵanda úsh ese joǵary, — dedi vedomstvo basshysy.

Energetıka mınıstrliginiń málimeti boıynsha Qazaqstanda munaı óńdeý kólemi 10,8 paıyzǵa artqan.