Qazaqstandyq kásipkerlerge lızıng alý nesimen tıimdi
ASTANA. KAZINFORM – Qarjylyq lızıng búginde shaǵyn jáne orta bıznesti damytýda mańyzdy ról atqaryp otyr. Onyń mańyzy týraly tolyǵyraq Qarjy naryǵyn retteý jáne damytý agenttiginiń tóraǵasy Mádına Ábilqasymova aıtyp berdi.
— Kásipkerlerge múlikti uzaq merzimge qosymsha kepilsiz paıdalaný tetigi retinde óte yńǵaıly qural usynylady, qamtamasyz etý quraly. Sonymen qatar, bul quraldyń mańyzdylyǵy tólem kestesiniń ıkemdiligimen, standarttalǵan sharttarmen erekshelenedi. Ásirese, banktik nesıege qol jetkizý kezinde kepil qoıý basty talap bolyp tabylatyn jaǵdaıda, lızıng asa suranysqa ıe, — dedi Mádına Ábilqasymova elordada lızıng taqyrybyna arnalǵan konferentsııada.
Onyń aıtýynsha, elimizde qarjylyq lızıngtiń quqyqtyq bazasy 2000 jyly qabyldanǵan qarjylyq lızıng týraly zańmen jáne azamattyq kodekspen retteledi.
— Atalǵan zańdar aıasynda lızıng sharttarynyń negizgi parametrleri, taraptardyń quqyqtary men mindetteri, lızıng alýshynyń quqyǵy retteledi. Búginde lızıng alýshylar retinde tek zańdy tulǵalar men jeke kásipkerler ǵana qatysa alady. Konferentsııaǵa daıyndyq aıasynda biz uzaq ýaqyt boıy lızıng naryǵynyń qazirgi damý jaı-kúıi týraly aqparat pen statıstıkany jınadyq. Bul salaǵa jaýapty ýákiletti organ Ulttyq ekonomıka mınıstrligi, sonymen qatar Ulttyq statıstıka bıýrosy da lızıng naryǵy sýbektileriniń qyzmeti týraly aqparat jınaıdy. Alaıda, qazir lızıng naryǵy týraly, qarjy uıymdaryna qatysty ortalyqtandyrylǵan, tolyǵyraq jáne turaqty aqparattyń jetkiliksiz ekenin kórip otyrmyz. Osyǵan baılanysty biz lızıngtik kompanııalar men Ulttyq statıstıka bıýrosynan jınaǵan derekterge súıenemiz, — deıdi ol.
Buǵan deıin habarlaǵanymyzdaı, Qazaqstanda lızıng assotsıatsııasy quryldy.
Aıta keteıik, búgin elordada «Qazlızıng — 2025: ónerkásip pen kásipkerlikti qarjylandyrý kózi retinde Qazaqstanda lızıngti damytý perspektıvalary» atty alǵash konferentsııasy ótip jatyr.