Qazaqstandyq kásipkerler TikTok arqyly taýar satýdy úırenedi
ASTANA. KAZINFORM — «Atameken» ulttyq kásipkerler palatasynyń tóralqa tóraǵasy Raıymbek Batalov shaǵyn jáne orta bıznesti qoldaý aıasynda áleýmettik jeliler men marketpleıster arqyly satýdy úıretetin oqytý baǵdarlamasy týraly aıtyp berdi.
Onyń aıtýynsha, «Ortalyq Azııa — Qytaı» iskerlik keńesiniń otyrysynda kásipkerler «jasyl dáliz» máselesi, sertıfıkattaý jáne marketpleıs sekildi tsıfrlyq sheshimderdi talqylaǵan.
— Biz búgin mıkro, shaǵyn jáne orta bıznesti qoldaýǵa baǵyttalǵan baǵdarlamalardy talqyladyq. Máselen, qytaılyqtar óz taýarlaryn qalaı jarnamalap, satatynyn baıqaǵan bolarsyzdar, olar jaı ǵana «mynany satyp alyńyz» demeıdi, taýardyń qanshalyqty fýnktsıonaldy, paıdaly ekenin naqty kórsetip, usynady. Bizde de oqytý baǵdarlamalary bar, olar qazir mıkro jáne shaǵyn bıznes úshin asa ózekti. Bul baǵdarlamalar TikTok platformasymen birge júredi, — dedi R. Batalov.
Sonymen birge, kásipkerlerge marketpleısterge shyǵý úıretiledi. Mysaly, «Bir aýyl — bir ónim» baǵdarlamasy aıasynda shaǵyn jáne mıkrobıznes ıelerine ónimdi marketpleıs arqyly satý úıretilgen.
— Bul kóptegen kedergilerdi, ásirese tıimsiz deldaldardy aınalyp ótýge múmkindik beredi. Jalpy deldaldyq jeke bıznes retinde qajet dep sanaımyz, biraq olar tym kóbeıip, tıimsiz bolǵan kezde bıznestiń damýyna kedergi keltiredi. Sondyqtan biz eń tıimdi úlgini usynyp otyrmyz. Men kásipker retinde ózime yńǵaıly bolatyndaı kózqaraspen qaraımyn. Meniń oıymsha, osy baǵdarlamalar men baǵyttar iri bızneske de, shaǵyn kásipke de naqty nátıje berip jatyr, — dedi UKP tóraǵasy.
Aıta keteıik, búgin elordada «Ortalyq Azııa — Qytaı» ІІ sammıti ótti. Oǵan óńirdegi 5 memlekettiń basshylary men Qytaı Halyq Respýblıkasynyń tóraǵasy qatysty.
Eń alǵashqy sammıt 2023 jyldyń 19 mamyrynda Qytaıdyń Sıan qalasynda ótken edi. Sammıt qorytyndysynda Memleketter basshylary Sıan deklaratsııasyna qol qoıyp, birqatar bastamany qabyldaǵan.
Sonymen birge, Ortalyq Azııanyń organıkalyq ónimderi Qytaı naryǵynda joǵary baǵalanady.