Qazaqstandyq kásipkerler Global New York Chamber of Commerce-pen yntymaqtastyqty nyǵaıtýda
ASTANA. KAZINFORM - 2025 jyly 24 aqpanda Nıý-Iorkte Global New York Chamber of Commerce (GNYCC) alańynda Qazaqstan men AQSh bıznes jáne dıplomatııalyq ókilderiniń kezdesýi ótti.
Talqylaýlar iskerlik baılanystardy nyǵaıtýǵa arnaldy jáne eki el arasyndaǵy saýda-ekonomıkalyq yntymaqtastyqtyń jańa baǵyttaryn anyqtaýǵa negiz qalady. Oǵan qarjy, densaýlyq saqtaý, aýyl sharýashylyǵy, IT salalary, sondaı-aq qazaqstandyq agroónerkásip ónimderiniń AQSh naryǵyna eksportyn ulǵaıtý máseleleri kirdi.
Іs-shara aıasynda GNYCC palatasynyń Prezıdenti S.Ómirzaqov, QR Nıý-Iork qalasyndaǵy Bas konsýly R.Tleýlın, Qazaqstannyń isker áıelder Assotsıatsııasynyń Prezıdenti R.Sársembaeva jáne Nıý-Iork qalasy Merııasynyń saýda, ınvestıtsııalar jáne ınnovatsııalar jónindegi komıssarynyń orynbasary D.Chaýhan sóz sóıledi.
Global New York Chamber of Commerce alańy Nıý-Iorktiń qarjy naryǵynyń ókilderi, ınvestorlar men isker seriktester úshin Qazaqstan ekonomıkasynyń damý dınamıkasymen, onyń áleýetimen jáne ózekti ınvestıtsııalyq jobalarymen tanysýǵa múmkindik berdi.
Qatysýshylar júrgizilip jatqan ekonomıkalyq reformalardy joǵary baǵalap, olardyń el men jalpy óńirdiń damýyna jańa serpin beretinin jáne bul Qazaqstannyń amerıkalyq bıznes úshin ınvestıtsııalyq tartymdylyǵyn arttyratynyn atap ótti.
Sonymen qatar kún tártibinde áıelder kásipkerligin damytý jáne óz isin keńeıtýdi kózdeıtin isker áıelderdi qoldaýǵa baǵyttalǵan, Astana qalasyndaǵy Áıelder kásipkerligi akademııasynyń baǵdarlamalary arqyly bastapqy kásipkerlerdiń básekege qabilettiligin arttyrý máseleleri talqylandy.
Osyǵan deıin ekonomıkaǵa tartylǵan ınvestıtsııa kólemi shamamen 40%-ǵa artqany týraly habarladyq.