Qazaqstandyq qarjy uıymdary halyqaralyq tólem standartyna kóshti - Ulttyq bank
ASTANA. KAZINFORM - Ulttyq bank Qazaqstannyń tólem júıeleri, ekinshi deńgeıli bankter men tólem júıesiniń ózge de qatysýshylary (bankter) tólem habarlamalarynyń halyqaralyq ISO 20022 standartyna sátti kóshirilgenin habarlady.
Jańa standartty eskere otyryp jańǵyrtylǵan tólem júıeleri men bankterdiń aqparattyq júıeleri 2025 jylǵy 13 qańtardan bastap jańa formatta iske qosyldy. Bankter klıentterdiń tólem tapsyrmalaryn aqparattyq júıelerdiń jumys kestesine sáıkes ádettegi rejımde, esh shekteýsiz jáne kidirissiz qabyldap jatyr.
- Jańa standart tólemderdi óńdeý isin avtomattandyrýǵa, sondaı-aq esep aıyrysýdaǵy jyldamdyq pen qaýipsizdikti arttyrýǵa yqpal etedi. ISO 20022 standartynyń ereksheligi – tólem nemese mámile týraly qosymsha málimetterdi berý múmkindiginde. Bul sáıkestendirý protsesin jeńildetip, qatelikterdi azaıtady jáne klıentke kórsetiletin qyzmet sapasyn arttyrady, - dep jazdy Ulttyq bankten.
ISO 20022 standarty qoldanylǵanda osy ádistemeni paıdalanatyn ártúrli aqparattyq jáne tólem júıeleri arasynda jahandyq úılesimdilik qamtamasyz etiledi.
Qazaqstan Ortalyq Azııa elderi arasynda alǵashqylardyń biri bolyp halyqaralyq standartty paıdalanatyn memleketterdiń qataryna kirdi. Endi Eýropalyq Odaq pen Ońtústik-Shyǵys Azııa elderimen birge transshekaralyq tólemderdi jeńildetip, halyqaralyq saýda-sattyqtyń damýyna yqpal etedi.
ISO 20022 standartynyń engizilýi qarjy ınstıtýttary men klıent (tutynýshy) arasyndaǵy ózara árekettesýdiń tıimdiligin arttyryp qana qoımaı, qarjy naryǵyndaǵy tehnologııalyq ózgeristerge biryńǵaı erejeler men rásimder negizinde tez beıimdelýge múmkindik beredi.
Buǵan deıin Ulttyq bank valıýta aıyrbastaýdyń jańa erejesin bekitetinin jazǵanbyz.