Karateden ÁCh: Qaısar Alpysbaı men Móldir Jańbyrbaı fınalǵa shyqty
Qazaqstandyq karateshiler Qaısar Alpysbaı men Móldir Jańbyrbaı (50 kg) Majarstan astanasy Býdapeshte ótip jatqan álem chempıonatynyń fınalyna joldama aldy, dep habarlaıdy Kazinform.
Sportty damytý dırektsııasynyń baspasóz qyzmetinen málim etkenindeı, kýmıte baǵdarlamasynda Qaısar 60 kelige deıingi salmaqta jartylaı fınalda álem chempıony, ıtalııalyq Andjelo Kreshentsony (Italııa) 5-1 esebimen jeńdi.
Qaısar Alpysbaı altyn medal úshin grekııalyq Hrıstos-Stefanos Ksenospen kúsh synasady.
Qaısar qazir WKF karateden álem reıtınginde 7-orynda tur. Ol Premer-lıga sanatyndaǵy básekede 3 márte top jarǵan. Sondaı-aq bıylǵy Azııa chempıony jáne Hanchjoýda ótken Azıadanyń jeńimpazy.
Móldir Jańbyrbaı 50 kelige deıingi salmaqta álemdik reıtınginiń kóshbasshysy, Venesýela karateshisin aıqyn basymdyqpen tize búktirip (11-3), sensatsııa jasady. Móldir jýyrda ǵana Azııa oıyndarynda kúmis júldege qol jetkizgen bolatyn.
Sondaı-aq jeksenbi kúni Dıdar Ámiráli men Sofıa Berýltseva qola medal úshin talasady.
«Bul – bizdiń elimiz úshin tarıhı sát. Alǵash ret eki sportshymyz álem chempıonatynyń fınalyna shyqty. Osyǵan deıingi iri jetistigimiz Darhan Asadilovtiń 2008 jylǵy kúmis medali edi. Eki fınalmen qosa eki qola úshin jekpe-jek kútip tur. Jalpy, eresekter arasynda bizden WKF karateden álem chempıony shyqpaǵan. Jastar, jasóspirimder sanatynda jeńimpazdar bar. Sátin salyp, elge eki altynmen qaıtýǵa barymyzdy salamyz», – dedi WKF karateden halyqaralyq dárejedegi tóreshi, ulttyq quramanyń bas bapkeri Asqar Moldaǵalı.
Aıta keteıik, WKF karateden ulttyq qurama XIX jazǵy Azııa oıyndaryna 8 sportshy aparyp, bári júldege ıe boldy (3 altyn, 3 kúmis, 2 qola). Sondaı-aq bıyl Azııa chempıonatynda alǵash ret jalpy esepte top jardy.
