Qazaqstandyq karateshiler halyqaralyq týrnırde eki altyn jeńip aldy
ASTANA. KAZINFORM — Reseı Federatsııasynyń astanasy Máskeýde WKF karateden 5-shi Moscow Karate Universe halyqaralyq jarysy aıaqtaldy. Bul týraly Týrızm jáne sport mınıstrligi Sport jáne dene shynyqtyrý komıteti habarlady.
Qazaqstan komandasy jarys nátıjesinde 2 altyn, 4 qola medal enshilep, jalpy esepte 2-orynǵa turaqtady.
Karateden qazaqtan shyqqan tuńǵysh álem chempıony Móldir Jańbyrbaı kýmıte baǵdarlamasynda 50 kelige deıingi salmaqta top jardy. Ol fınalda ózbekstandyq tatamı sheberi Dıera Pýlatovany aıqyn basymdyqpen jeńdi. Jekpe-jek 5-1 esebimen aıaqtaldy.
Tokıo Olımpıadasynyń qola júldegeri, 2 dúrkin Azıada jeńimpazy Sofıa Berýltseva (+68 kg) altynnan alqa taqty. Otandasymyz aqtyq synda Mahbýb Basharı Atenaǵa (Iran) esh múmkindik qaldyrǵan joq.
Gúlmıra Úsenova (-55 kg), Aıjan Bákirova (-61 kg), Azııa chempıony Daııana Darenskaıa (-68 kg) men Nıkıta Tarnakın (-84 kg) óz salmaǵynda úzdik úshtikti túıindedi.
Úsh kúnge sozylǵan básekege 40 memleketten 400-den astam tatamı sheberi jınaldy.
Eske sala keteıik, byltyr Qazaqstan sportshylary týrnırde 1 altyn, 2 kúmis, 2 qola medal ıelengen edi.
Aıta keteıik, buǵan deıin Suńqar Qanıbek Polshada ótken kadetter, jasóspirimder jáne jastar arasyndaǵy karateden álem chempıonatynda altyn medal jeńip aldy.
