Qazaqstandyq qandaı taýarlar sheteldik balamalarynan arzanyraq
ASTANA. KAZINFORM — Saýda jáne ıntegratsııa mınıstri Arman Shaqqalıev Úkimette ótken brıfıngte qazaqstandyq taýarlardyń ımporttyq ónimdermen qandaı artyqshylyqtardyń arqasynda básekege túsetini týraly aıtty.
Onyń aıtýynsha, birqatar taýar túrleri boıynsha qazaqstandyq ónimderdiń baǵasy básekege qabiletti bolyp qala beredi. Bul Eýrazııalyq ekonomıkalyq odaqqa (EAEO) múshe elderdiń ónimderimen salystyrǵanda da baıqalady.
— Baǵalardy salystyratyn bolsaq, biz árdaıym birqatar taýar boıynsha elimizdegi baǵanyń, tipti EAEO-daǵy áriptesterimizdiń baǵasymen salystyrǵanda da, jetkilikti deńgeıde básekege qabiletti ekenin atap ótemiz. Keıbir taýarlardyń baǵasy shynynda da ózgesheleý, keıde joǵary bolýy múmkin. Mysaly, qaǵaz jáne sabyn ónimderiniń baǵasy basqa óndirýshilerdiń baǵalarymen shamalas, — dedi spıker Úkimettegi brıfıng barysynda.
Mınıstrdiń aıtýynsha, baǵa aıyrmashylyǵynyń negizgi sebepteriniń biri óndiris kólemi.
— Іri óndiris oryndarymen básekelesý kez kelgen óndirýshi úshin ońaı emes. Sondyqtan basty nazar ónimniń biregeıligi men sapasyna aýdarylady. Taǵy da atap ótkim keledi, kóp jaǵdaıda Made in Kazakhstan belgisi, ásirese azyq-túlik ónimderinde, tabıǵı ónimdi bildiredi. Quramynda maı almastyrǵyshtar nemese raps maılary qoldanylmaıtyn, ekologııalyq taza ónim degen sóz. Sondyqtan biz tutynýshylar retinde ekonomıkalyq patrıotızmimizdi tanytyp, otandyq taýarlardy satyp alýymyz kerek, — dedi mınıstr.
Shaqqalıev sondaı-aq sheteldik brendterge qaraǵanda arzanyraq sanalatyn otandyq kıim brendteri bar ekenin aıtyp, mysal retinde erler men balalar kıimin shyǵaratyn jergilikti brendterdiń ónimderin keltirip, olardyń baǵasy túrkııalyq balamalarmen shamalas ekenin atap ótti.
— Mektep formasyn alaıyq. Árıne, qytaılyq balamalary bar. Biraq másele olardyń quramynda polıester sııaqty jasandy talshyqtardyń qoldanylýynda ma, álde tabıǵı maqtadan tigilgeninde me osynyń ózi óte mańyzdy, — dep túsindirdi mınıstr.
Buǵan deıin Made in Kazakhstan brendine bıýdjetten qarjy bólinbegenin jazǵanbyz.
