Qazaqstandyq IT joba álemdegi úzdik 5 bastamanyń qataryna endi
ASTANA. KAZINFORM – Qazaqstandyq IT joba WSIS Prizes 2025 nusqasy boıynsha álemdegi úzdik 5 bastamanyń qataryna endi.
Qazaqstannan «Ahýaldyq-taldamalyq kesheni» (ATK) tsıfrlyq jobasy WSIS Prizes 2025 halyqaralyq baıqaýynyń «Úkimetterdiń jáne AKT-ny damytý úshin ilgeriletýdegi barlyq múddeli taraptyń róli» nomınatsııasynda fınalısterdiń bestigine kirdi.
Baıqaýdy jyl saıyn BUU qoldaýymen Halyqaralyq telekommýnıkatsııa odaǵy (ITU) ótkizedi. Bıyl oǵan álemniń túkpir-túkpirinen 973 joba qatysty. Іrikteýdiń birinshi kezeńiniń qorytyndysy boıynsha árqaısysy 20-dan 18 nomınatsııa boıynsha 360 joba irikteldi. Márede ár nomınatsııa boıynsha 5 joba. Qazaqstanmen birge Ózbekstan, Rýanda, Meksıka jáne Birikken Arab Ámirlikteriniń bastamalary óz nomınatsııasynda fınalıstiń qataryna kirdi.
Prezıdent Іs basqarmasynyń Injenerlik-tehnıkalyq ortalyǵy ázirlegen ATK jobasy - memlekettik sektordaǵy derekterdi taldaýǵa, monıtorıngileýge jáne jedel basqarýǵa arnalǵan ınnovatsııalyq tsıfrlyq platforma. Júıe naqty ýaqyt rejıminde jumys isteıdi. Aqparatty jınaý, vızýalızatsııalaý jáne óńdeýdi qamtamasyz etedi. Strategııalyq sheshimder qabyldaýǵa jáne memlekettik organdar qyzmetiniń negizgi kórsetkishterin baqylaýdy júzege asyrýǵa múmkindik beredi.
Platforma búkil el aýmaǵynda áleýmettik-ekonomıkalyq damýdyń túrli baǵyttary boıynsha 500-den astam ındıkatordy qamtıdy. Búginde ATK Prezıdent ákimshiligi men Prezıdent Іs basqarmasynda engizilip, tabysty iske asyrylyp jatyr.
— Jeńimpazdardy fınaldyq irikteýdi ITU sarapshy qazylar alqasy júzege asyrady. Sońǵy nátıjeler 2025 jyldyń 8 shildesinde Jenevada (Shveıtsarııa) aqparattyq qoǵam máseleleri boıynsha Dúnıejúzilik joǵary deńgeıdegi kezdesýdiń 20 jyldyǵyna arnalǵan WSIS+20 high-Level Event aıasynda jarııalanady, — delingen habarlamada.
WSIS Prizes — halyqaralyq telekommýnıkatsııa odaǵy (ITU) aqparattyq qoǵam máseleleri boıynsha Dúnıejúzilik joǵary deńgeıdegi kezdesý (WSIS) aıasynda qurǵan halyqaralyq syılyq. Onyń maqsaty — Turaqty damý maqsattaryna (TDM) qol jetkizý úshin aqparattyq-kommýnıkatsııalyq tehnologııalardy (AKT) paıdalanatyn úzdik álemdik tájirıbelerdi anyqtaý jáne ilgeriletý.
Aıta ketelik, shetelge tanylǵan qazaqstandyq IT jobalar týraly jazǵan edik.